LAU urtez finalera fin-fin pasa eta gero, atzo bai, atzo Aitor Barrenetxeak ondo merezitako txapela jantzi zuen. Maialen Lujanbiok jantzi zion gainera, aurretik, antolatzaileek zapi txuri bat (gobararena izango zen) buruan jarri eta gero.
Hamabost protagonistak primeran. Giroa bikaina, eta musikatua, Aitor Atxegak gitarra eraman baitzuen kantulagun; bere eta gainerakoen kantulagun, besteek kantatu zutenean ere gitarrarekin armonizatu baitzuen giroa lasartearrak. Eta tabernetako armonian hasi eta bukatu zen saioa, ia lau ordu iraun zituena; baina jendea hurrengo urterako ere gogoz geratu zen.
Hamabostetik zortzi,
finalaurdenera
Hamabost izan ziren atzo partehartzaileak. Lau talde egin, eta lehendabiziko fase motz bat jokatu zuten. Hortik lau pasa ziren hurrengo fasera (talde bakoitzeko bat), eta gainerako guztiek errepeska jokatu zuten. Errepeskatik beste lau pasa ziren hurrengo fasera. Guztira, zortzi.
Azken puntuak
Urko, Oier, Exteban eta Barrenetxea pasa ziren azken txanpara, zortzi horietatik. Kartzelako lana egin, eta ordura arte kopletan egindako lana luzatu egin zieten, eta bertsotan aritu behar izan zuten.
Estu zirela kontuak! Denak oso ondo, eta bat primeran; Barrenetxea. Aitor Barrenetxeak irabazi du txapela, tabernetako bertsolarien nagusitza emango diona, urtebetez. Agurra Iraitzi eskaini zion, eta emozio batean bukatu zen, aurtengo bertso jarduna.
Parte hartzaileak.
Lehenengo 8ak ordenean:
Barrenetxea, Urko, Oier, Exteban, Oxan, Tximel, Abel, Alkorta, Atxega, Porrotx, Joseba, Gorkita, Arnaitz, Andoni, Iñigo.