zaborren ordenantzako puntu batzuk kezkagarriak direla dio, Hernaniko Hamaikabat taldeak, Udalean sartu berri duen idatzian. Idatzian dio, kezkagarriak eta legez zalantzazkoak iruditzen zaizkiola zenbait puntu, eta horregatik argibideak eskatu dizkie Udaleko zerbitzu teknikoei. Zaborren Udal ordenantza azaroaren 26an onartu zuen Udalak, eta orain erakusketa publikoan dago.
Legez zalantzazkoak
Zalantzazko legalitatea dute zenbait puntuk H1! taldearen ustez. «Urtebetean bi
aldiz zigortzea, lege hauste larriagotzat joko dela dio ordenantzak. Eskatzen dugu kontuan hartu dadila Eusko Jaurlaritzaren Tokiko Administraziotik 2007an bidalitako txostena, honakoa dioena: reintzidentzia izan liteke
zigorra larriagotzeko arrazoi bat, baina inoiz ezingo da
lege hauste larriagotzat jo, delitu txikiagoan reinziditzea».
Argitu beharreko puntuak
H1! taldearen ustez, badira zenbait puntu argibidea eskatzen dutenak. «Lege haustea egitearen ardura, legea hausten duen harena da. Bat baino gehiago bizi diren etxebizitzen kasuan, zeinena izango da legea haustearen ardura?. Bestalde, 40-2-b artikuluan ardura solidarioari buruz hitz egiten da. Txosten bat eskatuko dugu, kontzeptu horrek legez baliorik baduen argituko duena.
Zentzu bat baino gehiago izan ditzaketen zenbait puntu argitzeko ere eskatu dute: «adibidez, 43-3-h artikuluan lege haustea dela dio modu desorganizatuan zaborrak ateratzea. Edo 43-2-b artikuluan dio ontziak garbitasun egoera onean ez izateagatik 6.000,01 €-ko isuna izango duela. Zer esan nahi dute desorganizatuan edo garbitasun egoera onean horiek?»
Isunak izugarri gora
Arrazoia jakin nahi du H1! taldeak, isunak hainbeste igotzeko, «hain modu ikusgarrian igotzeko», lehengo ordenantzatik oraingora. «Lege hauste arinagatik, lehen 60,10 euro arte; orain 60 eurotik 6.000 euro arte. Lege hauste larriagatik, lehen 60,11 eurotik 450,76 euro arte; orain 6.000 eurotik 15.000 euro arte. Oso larriagatik, lehen 450,77 eurotik 30.050,61 euro arte; orain 15.000 eurotik 30.050 euro arte.