2009a ez da sagar urtea izan hemen, eta kanpotik ekarri behar izan da asko. Hernaniko sagardogileek azaldu dutenez, sagarrak berez du urte biz behin emateko joera eta teknikak erabilita, horri erremedioa jartzen ari den arren, oraindik urtero sagar asko izaterik ez da lortu. Aurten, Normandia eta Galiziatik etorri da sagar asko eta bertan izandakoarekin nahastuta, kalitate oneko sagardoak lortu ahal izan dira. Izan ere, hemen ez bezala, Normandia eta Galizian sagar asko izan da eta nahi diren sagar motak eta ondo helduak etorri dira.
«Iaz baino %30 sagardo
gutxiago egin da aurten»
Astigarragako sagardoetxearen esanetan, aurten 9 miloi litro sagardo ekoiztu dira, iaz baino %30 gutxiago. Joan den asteazkenean prentsaurrean azaldu zutenez, «apirilaren amaiera arte dastatu ahal izango den sagardoa aromatikoagoa da eta izaera haundiagokoa».