Zeberio II-Badiola txapeldun

2010eko Tejados Aoiz Binakako Txapelketa Nagusiko txapelek badituzte jabeak: Zeberio IIa eta Badiola, hain zuzen. Urriza eta Lizasori 40-34 nagusitu zitzaizkien gipuzkoarrak atzoko finalean. Partidua espero bezala, gogorra eta borrokatua izan zen eta Zeberio IIa eta Urriza aurrelariek ikuskizun ederra eman zuten. Badiolak ere bere jokurik onena erakutsi zuen eta sakez 8 tanto egin zituen. Partidua nahiko orekatua izan zen, baina gorriak aurretik izan ziren ia partidu osoan. Hala, Zeberio IIak jokatutako sei finaletatik sei txapel lortu ditu eta Kike Elizaldek zuen errekorra hautsi du. Badiolak berriz, bikotekako lehenengo txapela lortu du. Biak pozik azaldu ziren txapela irabazteaz gain, partidu zaila irabazteagatik.