«Gure sagardo berria» esanaz ireki zuten atzo Astigarragako txotx denboraldia Real Sociedadeko kideek. Irekiera Petritegi sagardotegian izan zen eta aurtengo lehenengo sagardo tragoa Jokin Aperribay presidenteak, Mikel Aranburu kapitainak eta Martin Lasarte entrenatzaileak hartu zuten, eta Realeko ia talde osoa bertan izan zen bazkaltzen.
Kalitateko sagardoa
Irekiera aurretik, prentsaurrekoa eman zuten (bertan ziren, Astigarragako alkatea, Diputazioko eta Jaurlaritzako arduradunak, eta Realeko lehendakaria) eta bertan, aurtengo sagardoaren berri eman zuen Joxe Angel Goñi Sagardogunearen bozeramaileak. «Uzta eskasa izan da, aurten, %30 gutxiago bildu da, gehiegizko eguzki eta lehorte-aldien eraginez, eta kanpotik ekarri behar izan da. Dena dela, lortu dena kalitate haundikoa da eta aurtengo sagardoa aromatikoa eta izaera haundikoa da».
Prentsaurrekoan, Petritegiko Jokin Otaño zena izan zuten gogoan.
Ezker Abertzaleak
oroigarria Aperribayri
Ezker Abertzalea ere presente izan zen prentsaurrean eta txotx irekieran. Salatu zuten, herriko alderdirik bozkatuena izanda, udaletik kanpo daudela. «Benetako ordezkaria izanda, agurra eman nahi izan diogu sagardo denboraldi berriari, eta Reala zoriondu nahi izan dugu».