«ez dakit zer esan...», eta hara, streep teasea egin zuen Aizpea Goenagak atzo, txotx irekiera ekitaldian. Sagardoa estimatzen duela argi utzi zuen aktore, zuzendari eta gidoilari donostiarrak. Berokiko botoiak askatu eta... Nik maite txotx jartzen zuen nikia zeraman jantzita. Umorearen bidez, deia luzatu zuen sagardoaz gozatzeko eta txotxean parte hartzeko, plaza bete jenderen aurrean. Marian Beitialarrangoitia alkateak ere, Hernaniko sagardotegietara joateko gonbita luzatu zuen, eta azaldu zuen aurtengo denboraldia ere ondo joatea espero duela: «iazkoa bezalakoa baldin bada, ez dago gehiago eskatu beharrik». Esan beharrekoak esanda, Kontxita Zubeldia eta Jon Peñaren eskutik Aitor Beginoren eskultura jaso zuen Goenagak eta ondoren, sagardo berriari lehenengo tragoa egin zion. Atzetik, Plazara hurbildutako guztiek probatu ahal izan zuten. Sagardoa txotxetik edateko aukera izango da apirilera arte.
Goiz pasa ederra
Eguraldiak ere lagundu zuen eta goiz pasa ederra izan zen atzokoa. Baina eguraldia ez zen izan lagundu zuen bakarra. Zerikusi haundia izan zuten, trikitilari, dantzari, txalapartari, bertsolari, harrijasotzaile, aizkolari eta txarangak. Postuan mokadu goxoak prestatzen aritu zirenek ere izan zuten meritua.
Presoak eta Egunkaria
presente
Irekiera ekitaldiarekin batera, preso politikoen senideek egindako kontzentrazioa izan zen Plazan, eta horrez gain, Egunkariaren aldeko mahaia ere izan zen.