hernaniko Udaleko Inmigrazio sailak, Anitzak Ekimenaren dinamizazioarekin, aniztasuna eta elkarbizitzari buruzko hausnarketa prozesua jartzeko asmoa azaldu zuen urrian, eta dagoeneko martxan da. Amaia Benito Anitzak elkarteko dinamizatzaileak Kronikari azaldutakoaren arabera, Hernaniko gizarte-eragile ezberdinekin biltzen ari dira, hala nola, AEK, Dobera, Ikastola batzuk, Amher, Askapena emakumeen elkarteak, kultur eragileak... «Herriko egoeraren berri izateko eta Hernaniko populazioaren mapa erreal bat osatzeko». Bere esanetan, prozesu honetan beraiek duten ikuspuntua bildu nahi izan dute, «datuez gain garrantzitsua delako bizipenak ere biltzea». Diagnosi kuantitatibo horren hurrengo urratsa, sentsibilizazio jardunaldia izango da. Hori hilaren azken astean izango dela aurreratu du Benitok. Asmoa da osatutako mapa hori guztiei erakutsi eta, aldi berean, gizarte-eragile edo herritarrak elkartzeko eta hausnarketarako gune bat sortzea. Hurrengo pausoa herritarren esku Benitok azaldu duenez, beraiek dinamizatzaile lana egiten dute, lehenengo pausoa eman, herriko pertsona ezberdinak bilduko dituen espazio hori sortzeko, baina ez gaude bideratzeko; hori jendeari dagokio.
Anitzak Ekimena: jatorri anitz, herri bat
Anitzak ekimena Euskal Herritik kanpo etorritako pertsonez osatutako herri ekimen bat da, beraien jatorriak askotarikoak izanik. Kanpotik etorriak izan arren, herri honen parte sentitzen dira eta pertsona migratzaileen eskubideak eta Euskal Herriari, nazio gisa, dagozkion eskubideak bateragarriak direla sinesten dute. Eta ezinbesteko ikusten dute elkarren errespetuan eta aitortzan oinarritutako politikak bultzatzea.
Beraien esanetan, «aniztasunean guztiok gaude sartuta ez kanpotik etorritako jendea bakarrik eta jatorrien aniztasuna ez da oztopo izan behar, tresna positiboa baizik. Elkarbizitzari dagokionez, «guztiok dugu zerbait esateko, guztiok gara errealitatearen subjektuak, jatorria edozein izanda».