FINAL erdiak puri-purian dira Tejados Aoiz erremonteko binakako txapelketan, eta bihar eta etzi erabaki daiteke zein bi bikotek jokatuko duten finala. Bentajarekin daudenak bi bikote dira, finalerdietako lehendabiziko partidua irabazi zutenak: Urriza eta Lizaso, eta Zeberio IIa eta Badiola. Urrizak eta Lizasok bihar jokatuko dute, Juaristi eta Urrutiaren kontra, Galarretan, 16:00etatik aurrera, bigarren partidua. Zeberio IIak eta Badiolak etzi jokatuko dute Huarteko Euskal Jai frontoian, Ezkurra eta Ionen kontra. Oraingoz, jokurik onena azaldu dutenak Zeberio IIa eta Lizaso izan dira, eta espero baino lan gehiagorekin dabiltzak Urrutia eta Ezkurra. Laister ikusiko da, beraz, batzuek eusten dioten, edo besteak berpizten diren.