Bertso eskolak ‘Hernani Bertsotan’ proiektua aurkeztuko du gaur Biterin

BERTSOLATA gaur bukatuko da, ‘Hernani Bertsotan’ proiektuaren aurkezpenarekin. Hernaniko Bertso eskolak eskuartean du orain arte Her­nanin bertsoari buruz egin den lanik haundiena: bi DVD, liburu bat, unitate didaktikoak eta web orrialde bat biltzen dituena.
DVDak otsailean publikatuko dira, eta gainerako hiru lanak urte bukaeran prest izango dituzte. Gaur, proiektu osoaren aurkezpena egingo dute Biterin, 19:00etan, eta bertan eskainiko dute bi DVDen aurrerapen bat.

Puntako jaialdia Oialumen
Larunbatean 400 lagun inguru bildu ziren Oialumen, puntako seikote bat entzutera. Lujanbio, Arzallus, Maia, Egaña, Zelaia eta Rezola izan ziren kantuan, Otxotorena­ gai jartzaileak gidatuta. Oia­lu­meko giro gozoan, bertsolariek ere gozatu egin zuten; Egañak esan zuen marka zela Hernaniko ber­tsolatan Asti­ga­rragako lurretan kantatzea, baina atzoko giroa ikusita, eta bertsolatan lehen aldia den arren Oialu­men kantatzen dela, garbi geratu zen ez dela azkena izango.  

Sorpresa eta guztiko saioa
Gabon giroak kutsatuta-edo, oparitarako gogoa izan zu­ten atzo denek. Saio bu­kae­ran, Hernaniko Udalak bertso es­kolari detaile txiki bat oparitu zion, urteetan egindako lana eskertzeko; bertso eskolak, berriz, Maialen Lujan­bio txapelduna zoriondu zuen.

Udalak bertso eskolaren lana eskertu zuen

Oialumeko jaialdian.  Bertso eskolaren «urte luzetako lana, inplikazioa eta euskal kulturaren alde egiten duen aportazioa» eskertu zuen Hernaniko Udalak, larunbateko saioan. Udalaren izenean, Marian Beitialarran­goi­tiak eta Idurre Lukasek megafonia txiki bat oparitu zioten
bertso eskolari, «orain arteko lanean jarraitzeko izan dadila; Hernaniko kaleak alaitzen jarraitzeko». Bertso eskolaren izenean, Oier Iurramendik hartu zuen saria.

«Zu betidanik zera txapeldun, nahiz duela gutxi jantzi».

Maialen Lujanbiok Euskal Herriko txapela jantzi duela-eta, Iraulio Panttalone bertso eskolak omenaldi txiki bat egin zion Oialu­men. Joxe Luix Urdangarinek argazki bat eman zion, guztien izenean, «zure aitamenak izango dira, beste larogei urtian» zioena, eta bertso batez gogorarazi zion, bertso eskolakoentzat zer izan den: «zu betidanik zera txapeldun, nahiz duela gutxi jantzi».