Bi bikotek pausu bat aurrera egin dute erremonteko binakako txapelketako final erdietan. Atzo Urrizak eta Lizasok irabazi egin zieten Juaristi eta Urrutiari, 40-31, eta joan den astean Zeberio IIak eta Badiolak irabazi zieten Ezkurra eta Ioni, 40-29. Finalerdiak bi partidutara jokatzen ari dira, eta horiek joaneko partiduak ziren. Bueltako partiduak datorren astean jokatuko dituzte, berriz ere bikote berdinen kontra, eta hor ikusiko da zein sartuko den finalera, edo zeinek jokatuko duten hirugarren partidua, desenpatekoa. Asteartean, Galarretan, Urrizak eta Lizasok jokatuko dute Juaristi eta Urrutiaren kontra; eta asteazkenean, Ezkurra eta Ion ariko dira Zeberio IIa eta Badiolaren aurka, Huarteko Euskal Jai Berrin.