Urte berriari ekiteko, ekintzaz gainezka dator urtarrila Astigarragan. Eta ohi bezala, zinea, ipuina eta antzerkia izango dira eta horrez gain, haur parkea, gazte informazio gunea eta sagardo berriaren eguna. Haur parkea, gaur bertan izango da. Haurrek gozatzeko izango dituzte: puzgarriak, ludoteka, gomming-a eta jokoetarako pantailak. Kiroldegian izango da goiz eta arratsalde: 11:30etatik 13:30etara eta 17:00etatik 19:30etara.
Haurrentzako zinean
‘Ponyo itsaslabarrean’ eta ‘Zientzia fikzioa’
Zineari dagokionez, haurrentzako ikusgai izango dira Ponyo itsaslabarrean eta Zientzia fikzioa pelikulak. Lehenengoa urtarrilaren 9an, datorren larunbatean, izango da eta Zientzia fikzioa hilaren 16an. Biak kultur etxean izango dira 17:00etan. Sarrerak euro batean daude salgai kultur etxean, proiekzioa izango den astean eta emanaldia baino ordu bete lehenago.
‘Ali Baba eta 40 lapurrak’ ipuin orduan
Urtarrilaren 12an, ipuin ordua izango da Lur Kortaren eskutik. Ali Baba eta 40 lapurrak ipuina eskainiko du liburutegian. 3-5 urte bitarteko haurrentzat 17:45etan izango da eta 6-9 urtekoentzat 18:15etan.
Antzerkia: ‘Anbotoko Mari’ haurrentzat eta ‘Ate joka’
helduentzat
Antzerki emanaldirik ere ez da faltako hil honetan kultur etxean. Anbotoko Mari antzezlana izango da haurrentzat hilaren 24an, 17:30etan. Sarrerak salgai izango dira 2,5 euroan.
Helduentzat berriz, Ate joka emango dute urtarrilaren 30ean, 22:00etan, eta sarrerak salgai izango dira 4 euroan.
Sagardo berriaren eguna hilaren 13an
Sagardo denboraldiari hasiera emateko, sagardo berriaren eguna izango da hilaren 13an. Aurkezpena egingo da kultur etxean 12:00etan eta sagarrondo bat landatuko da. Ondoren, Petritegi sagardotegian, txotx ekitaldiarekin denboraldiari hasiera ofiziala emango zaio.
Horrez gain, KZ Gunea irekita izango da hilaren 11 eta 25ean eta Guraso-eskola izango da hilaren 13 eta 27an, Arantzazuko Ama ikastolak antolatuta.
Aldaketa batzuk ere badira: Gazte informazio gunea orain astelehenetik ostiralera egongo da zabalik eta Gaztelekua asteartetik igandera.