Atzean utzitakotik aurrera begira jarri da Marian Beitialarrangoitia alkatea, urte berria hasi den honetan, eta hala azaldu du: «etortzear dena atzean uzten duguna baino hobea izateko itxaropena zuenganatu nahiko nuke».
Itxaropen horretan hiru proiektu nabarmendu ditu: alde batetik, «sinatu berri ditugun bi hitzarmenek, Galarreta eta Estubegiko proiektuek alegia, etorkizun hobea irudikatzeko bidea ematen digute, arlo ekonomikoari begiratuta»; bestetik, «herri honen etorkizunari begira, hondakinen kudeaketa egokiago baten eskutik gure osasuna lehen lerroan jartzera goaz, adibide txiki baina aldi berean aurrerapauso haundia izango da atez ateko sistemaren alde egitea»; eta azkenik, «2010 kultur gunea berandu baino lehen egia izan dadin proiektua egiten hasteko urtea izango da».
Herritar guztien bizimodua hobetzeko konpromisoa
Urte berria hobea izango den itxaropenari lotuta gaineratu du: «Ea lanean uzten gaituzten bestelako mamu eta mehatxu okerrak albora utzita, horien bidez ezer onik ez dator-eta herri honetara. Ni neu behintzat, jazarpenak jazarpen, lanerako gogotsu nago eta bide hori elkarrekin urratzea nahiko nuke». Bere ahalegina horretan dagoela dio, «herritar guztien bizimodua hobetuko duen bidea lantzeko konpromisoan».
Jasotako laguntza eskertu eta une zailak bizi dituztenak gogoan
«Bidea zailagoa den neurrian, astinduak jasotzen diren neurrian», kolpearen ondorioak jasotzen direla dio Beitialarrangoitiak, «baina ez mugitu ezinda uzteraino». Eta horretan laguntzen dutela azaldu du, «askoren maitasunak eta elkartasunak». Bide batez, une zailak bizi dituztenei bere maitasuna eta elkartasuna bidaltzen dizkie «samina desagerrarazteko nahikoa ez izanda ere, lagungarri izango delakoan». Modu batera edo bestera, denak gogoan dituela aipatzen du eta itxaropenik ez du galtzen, «etorkizunean lotzen gaituena banatzen gaituena baino gehiago izateko, bidean oraindik denekin bat egitea lortu ez dugun arren».