HERNANIKO bertso eskolak bi DVD aurkeztuko ditu datorren astelehenean Biteri kultur etxean: Hernani Bertsotan. Hernanin bertso munduan ibilitako eta dabiltzan ia 40 laguni egindako elkarrizketak osatzen dute lana, orain dela hiru urte hasi eta gaur egun arte iraun duena.
Jenerazio guztietako bertsolariak, eta bertsozaleak agertzen dira bi DVD horietan, noizbait bertso munduan ibili izan direnak, eta gaur egun buru-belarri dabiltzanak.
Txabalategi, Olegario Garin, edo Ttanttua bertsolarien kontuak, besteak beste
Inoiz argitaratu ez diren Txirritaren bertsoak, Olegario Garinek Pello Errotari botatako bertso famatua (jende asko begira zela), eta antzeko gertaera asko biltzen ditu lanak. Irubidietako eta Ereñotzuko urteroko saioak, ugaldetarrak, zubiarraindarrak, Ttanttua, Santa Kruz, Lexoti eta abarren bertsoak.
Bertsoa giro askoren lekuko izan da Hernanin, gerora forma asko hartu ditu, eta esperimentazio ugari egin dira bertsoaren munduan: ohiturazko errondak eta urteroko saioak, edo helduen bertso eskola bezalako esperientziak, edo bertso musikatuak, bertso antzerkia...
Ia 40 elkarrizketa, garai askoren ordezkaritza
Antonio Zubiarrain bertsolariak adibidez, gerra aurrean Hernanin zen bertso giroaren berri eman du. Zein bertsolari ziren, Paulo Txikia bere anaiaren kontuak, eta abar. Tturkok, Aterpek, Garinek, Florian Oiarbidek ondo ezagutu zuten gerra osteko Hernaniko egoera, eta garai hartan bertsoari nola heldu zitzaion kontatzen dute. Joxe Mari Arrietak, Joanjo Uriak, Anatxek eta abarrek kontatu dituzte garai modernoagoetako kontuak: bertso eskolaren sorrera, bertso saioen boom haundia noiz eta nola bizitu zen...
Hasierako bertso eskolaren kontuak kontatu dituzte, besteak beste Sorozabal, Urdangarin, Eizmendi, Zelaia, Tolosa eta Agirrek.
Maialen Lujanbio, Aitor Mendiluze, Jexux Mari Irazu eta abar ere agertzen dira DVDan, herritik kanpora asko eta elitean ibilitako bertso eskolako kideen ahotsa.
Iker Osa, Jon IraoIa, Xabier Legarreta, Eñaut Agirre, Estitxu eta Ixiar Eizagirre, Agin Rezola, Joxe Angel Aranburu eta abar dira jenerazio berriagoko bertso eskolaren erreleboa pasa dutenak; eta erreleboa hartu dutenak: Arnaitz Lasarte, Oier Iurramendi, Amaia Otxotorena, Asier Azpiroz, eta Beñat eta Unai Gaztelumendi.
Ahozko ondare mardula
Gaur egun hernaniarrek bertso munduan duten itzala nabarmena da oso, baina bertsoaren kabietako bat bezala beti ezagutu izan da Hernani eta ingurua. Bertsoaren bitartez, ezin konta ahala istorio eta historia iritsi dira gugana, eta altxor hori jaso nahian, Hernaniko Bertso eskolak proiektu oso bat jarri du martxan.
Astelehenean aurkeztuko diren 2 DVD horiez gain, beste hiru lan ere argitaratuko dira datorren urte bukaeran: liburua, ikastetxeetarako ikas-materiala, eta lan guztiak bilduko dituen web orrialdea.
Proiektu osoak 70.000 euroko aurrekontua du, eta Hernaniko Udalaren eta Gipuzkoako Foru Aldundiaren babesa, jende askoren laguntza, eta Iraulio Panttalone bertso eskolaren lanari esker egin dute: herri batean bertsolaritzari buruz inoiz egin den lanik mardulenetakoa.
Lau bertso bilduma, lau formatutan, gazte eta helduentzat erakargarri
Liburua, ikastetxeetarako materiala, eta web orrialdea dira Hernaniko bertso eskolak martxan dituen beste 3 proiektuak, 2011 urte hasierarako bukatuak izango dira hirurak.
Astelehenean aurkeztuko dira dagoeneko ia osatuak dauden bi DVDak, baina proiektu osoak beste hiru lan ere biltzen ditu, DVDaz gain, eta horien berri ere emango dute Hernaniko Bertso Eskolako kideek. Guztira, lau lan dira, formatu ezberdinetan kaleratuko direnak, bertsozale ahalik eta gehienengana iristeko asmoz eginak.
Lan osoak bilduko ditu beraz: bi DVD, bertso liburu mardul bat, ikastetxeetan bertsolaritza erakusteko unitate didaktiko multzo bat, eta lan guztia eta gehiago bilduko dituen web orrialde bat. Guztia bukatua izango da, 2011 urte hasieran.
DVDa Jexux Mari Irazuk egin du, Unai Agirreren laguntzarekin. Web orria ere J.M. Irazu ari da egiten. Liburua egiten Estitxu Eizagirre ari da, eta ikastetxeetako unitate didaktikoen ardura Aitor Mendiluzek dauka.
Liburua, proiektuaren ardatz
Dagoeneko martxan dago bertso liburua, proiektu osoaren ardatza izango dena. Liburua kronologikoki antolatu dute, eta garaian garaiko bertsolarien berri emango du. Urteetan errepikatu diren ekintza eta gai esanguratsuak ere liburuan txertatuta joango dira.
Web orria eta unitateak
Unitate didaktikoak, liburuko eta DVDko informazioarekin egingo dute, eta Hernani eta beste herrietako ikastetxeetan erakutsiko dute, datorren urtetik aurrera.
Proiektu guztia web orrialde batean kaleratuko da, eta web orrialde hori, gerora, Hernaniko Iraulio Panttalone bertso eskolaren web orrialde nagusia izango da.