orain dela hilabete izendatu zuten Jose Ignacio Munilla Donostiako Gotzain berria, eta Gipuzkoako elizaren ordazkari gehienek, hau da, %77ak, idatzi bat sinatu zuten Gipuzkoako Elizbarrutirako Gotzain berriaren izendapenagatik «samina» eta «kezka» agertuz. Hernaniko artzapez-barrutiko zortzi parrokok ere sinatu zuten idatzia: Jose Luis Aperribai Hernaniko parrokoak, Iñaki Aranzadi Urnietakoak, Mikel Goenaga Astigarragakoak, Arturo Garcia eta Jose Ramon Trebiño Martutenekoek, Jose Maria Ormazabal Gurutze Santukoak, Manuel Oyarzabal S. Martin Sorabilakoak eta Iñaki Zabaleta S. Martin Toursekoak.
Azpi-asmoa eta prozedura gaitzetsi
Apaiz eta erlijioso hauek gaitzetsi egiten dute «Gotzain berria izendatzeko izan zen azpi-asmoa eta erabili den prozedura» eta «deituratu» egiten dute erabaki hau hartzean Elizbarruaren eta beraren erakunde pastoralaren sentimena aintzakotzat hartu ez izana eta errespetatu ez izana. Horrez gain diote, Munillaren ibilbidea Elizbarrutiko lan-ildoetatik urruti dagoela.
Orain arte landutako ereduari eutsi nahi
Baita ere aditzera eman dute bat datozela beraien Elizbarrutian orain arte landu duten ildo pastoralarekin eta eliz ereduarekin, eta horiei eutsi nahi dietela eta horien arabera jarraitu lanean. Eta hala azaldu dute: «ziur gaude gurekin izango dugula sinestun askoren lankidetza».