lau gaztek debutatuko dute gaur Galarretan, profesional moduan; tartean, hernaniar bat eta goizuetar bat dira. Elkarren kontra ariko dira gaur lau gazteak: Urrutia II-Barrenetxea IV, Oñatz-Zubiri. Jaialdiko lehen partidua izango da, 16:00etan, Galarretan.
Bi gipuzkoar eta bi nafar
Gipuzkoarrak dira bi, Endika Barrenetxea (Hernani) eta Oñatz Gonzalez (Andoain); eta nafarrak beste biak: Aritz Zubiri (Goizueta) eta Oskar Urrutia (Saldias). Afizionatutan urte batzuk egin dituzte, eta orain izango dute aukera, urte hauetan ikasi dutena erakusteko.
Endika Barrenetxea hernaniarrak 19 urte ditu, atzelaria da, eta 3 urte daramazki afizionatutan. Barrenetxea IV bezala jokatuko du, familian beste hiru bai baitira profesionaletan jokatuak: Jose Mari aita, eta bi lehengusu, Iñaki eta Aitor.
Aritz Zubiri goizuetarrak 22 urte ditu, atzelaria da, eta 6 urte daramazki afizionatutan. Jokua ondo ezagutzen du, eta gaur du urteetan desiratu duen bere aukera.
Profesionaletan hilabete batzutako kontratua egin die enpresak, eta hilean 6 partidu inguru jokatuko dituzte; proba hori gaindituta, pixkanaka euren postua lortu beharko dute onenen artean.