txantxillako etxebizitza tasatuetan adjudikatutako pertsonen zerrenda filtratzea egotzita, bi hernaniarrek inputatu gisa deklaratuko dute epailearen aurrean, asteartean. Marian Beitialarrangoitia alkateak salaketa jarri zuen, bere arabera, zerrenda hori Udalak onartu aurretik, argitara eman zelako, eta izenak publiko egitea delitua izan zitekeela iritzita. Ondorioz, Epaitegiaren bidez, ikerketa bat zabaldu zen. Abokatuak azaldutakoaren arabera, ikerketarekin identifikatu dira zerrenda «filtratu» zuten bi IP (ordenagailuen DNIa litzatekeena), IP horien jabeak izanda, bi hernaniar.
Udaleko foroan
Txantxillan egin diren etxebizitzetatik 33 etxebizitza tasatuak dira eta otsailean, adjudikatutako pertsonekin zerrenda osatu zen Udalean onartu zedin. Abokatuak esandakoaren arabera, zerrenda hori Udalak onartu aurretik, Udaleko foroan argitaratzen hasi zen norbait, behin eta berriz.