Atzoko saioan bertso maila izugarria izan zen, goizean goizetik hasita.
Fuerte hasi ziren Hernaniko bertsoeskolako kideak. Zortziko haundian: 80 urteko aitak, hiltzorian dagoenak aitortu die, etxe aurreko pagoaren azpian Gerra Zibilean hildako 2 gorputz daudela:
Mendiluzek:
...Lehio ertzetik horri begira
Ordu luzeak egina
Udaberri ta udazkanean
Begirada desberdina.
Lujanbiok:
...Ta orain ohean lasai etzaten
Zarela guk ikusirik
Esan nahi eta esan ezinak
Mantendu zaitu bizirik
Zortziko txikia izan zen goizeko saiorik biziena, eta zeinek baino zeinek bertso hobeak bota zituzten.
Colina eta Iturriaga, biak telebistako aurkezleak. Programa hasi, eta Iturriaga hankarekin ukitzen hasi da. Iturriagak:
...formatu honetara
ez zara ohitu edo?
hau aurrerapena da
notizia gero
Sustrairen erantzuna:
...zuk izan nahi zenuke
notizi estelarra
baina laburregia
duzu titularra
Amets-Sarriegi: Aitorrek bost ordu daramazki posatzen, eta Amets margolariak ez du bere autoerretratua bukatzen:
Sarriegik:
Arkatza hartu eta
nolako abaila
zalantzan jarriko det
laister zure maila
bi begi ta aho bat
sutur bat masaila
kontxo, dibujatzeko
ez naiz horren zaila
Egaña amak eta Aitor semeak parrez jarri zuten BEC. Semearen lehen lan egunean, lankideekin bazkaltzera dijoa Aitor, eta Egaña ama zai dauka tuperbarea hartuta:
Egañak:
Etxean beti gose
ta beti asekaitz
hargatik tupperrakin
etorri ni garaiz
lantegitik irtena
zazpi lagun alaiz
denentzako egin det
zuekin joango naiz
Mendiluze:
...semea berriz ere
denen parregarri
zerbait eskatzen dizut
ama, nago larri...
ez zaidazu lepoan
serbileta jarri
Maialen Lujanbio kartzela. Gaia honakoa zuten: kazetaria zara eta zure azken artikulua izango dena idazten ari zara.
Mila ta bostehun karaktere
ia betiko erara
Nire iritziz osatu ditut
hor gelditzen dira hara
Nire afizio ta ofizio
hainbat urteko pasada
Egin dute ta orain atzeruntz
itzultzen dut begirada
Del Olmok diost: ´-Ai! Justizia,
uste zendun zer zala ba?
Gure justizi hau zuentzako
prestatutako zelda da`
Beraz Berrian uzten dizuet
nire azken zertzelada
Lehen idatzi nuenagatik
naramate kartzelara
.
Amets Arzallusek ere aitzakiarik gabekoak bota zituen kartzelan:
Hamasei urte ta egunkarian
hasi nintzen bekario
Martxelok hantxe jarri ninduen
beste baten gregario
Gero Berrian saiatu nintzen
lan onaren ondorio
Gero argian serio
Beste hitzaren jario
Berrogei urte pasatu ditut
berrogei kalendario
Orain lumari tintaren partez
malko pila bat dario
Arratsaldekoa
Arratsaldeko lehen lanetik nabarmendu ziren Maialen eta Amets. Gaia: Ametsek mahaitik ez altxatzeko eskatu dio Maialen amari, baina lehen platera bukatzean altxatu da ama.
Ametsek:
…Etzaitez sutondora
joan hola korrika
Olentzero oraindik
ez da etorrita
Maialenek:
…ez da urte berria
oraindik da aurten
Ai urte berrirako
ze gogo neukaken
Eta seme alabek
ze jeta daukaten
Beti ez jeikitzeko
dabiltza esaten
Platera sukaldera
ez da oinez joaten
Maialenek bakarkako bigarren bertsoak lortu zuen arratsaldeko txalo zaparradarik haundienetakoa: Medikua zara. Minbizia duten bi haur ikusten dituzu pasiloetan gurpildun aulkiekin lasterketak egiten.
Egiten dute irrifar eta
begitan dute diztira
Etsitzen dute nahiz ta lagunak
eta eskola desira
Denborarako egin zieten
laguntxoei despedida
Ta orain biak hemen dabiltza
juerga, salto, buelta, biba!
Tututxo batek lotuta dauzka
oxigenoan harira
Baina kontentu ta lasai daude
jolas hoietan argi da
Ta maitasuna behar dutenak
euren gurasoak dira
Mendiluzek ere aitzakiarik gabekoak bota zituen: Zure aitaren izena zuen kaleari izena aldatu diote.
Latoizko txapa lauki horia
Ez zen haundia ez zen lodia
Baina kaleak berari esker
Halako kategoria
Txikia du hilobia
Haundiago historia
Geure alde eroria
Ta horregatik honek pizten du
Neure zainetan goria
Ia hil zuenak borratu nahi du
Gure aitaren memoria.
Gabonetako opariak jartzen harrapatu zuen alabari Egañak horrela kantatu zion:
...Olentzero ez da etorri
ta ez dakit nola esan
ERE bat ipini dute
lan egiten dun enpresan.
Autobusean inor ondoan ez zaiola esertzen, jarri zioten gaia Ametsi, eta hendaiarrak hiru bertsoak bota zituen goitik beherakoak; bigarrena:
Ni Mohamend naiz izenez
Ta iñaki ezizenez
Neure motxila gizenez
Disko saltzaile naizenez
Autobus hontan nator goizero
neure gogo neure senez
Batenbat neure ondoan ia
jartzen den itxaropenez
Baina hemengoak azalez eta
hitzez zuriak direnez
Bi urteotan ez dator inor,
ta hemen nator nire penez
Autobus baten barruan goaz
baina bide berean ez
Buruz burukoa
Ofiziotan 6ko motzean fuerte hasi ziren biak ere. Gaia: Zuen ama gaur irtengo da anorexia sendatzeko zentrotik. Hirurentzat bazkaria prestatzen ari zerate:
Maialenek:
...Ispilua ere hor daukazu
Andre ederra zera zu
Ispiluari gezurra zuk zeuk
Esaten diozu
Ametsek
...Gaurtik aurrera gure begiak
Dituzu ispilu
8ko txikian euren semeari oinez erakusten ari zirela, arkume bat ikusi dute oinez:
Amets:
Oinez hasi ez da ba
hankik ez du hautsi
Hoiek zenbat dakiten
Pertsonek ze gutxi
Maialen:
Azkar ikasten dute
Ta bizi guziko
Baina hizketan ez dute
Bela ikasiko
Sua hitzari honakoa bota zion Maialenek:
Ura asmakizuna
Homo abilisena
Bazun intentzioa
Bazuen sena
Bi harri elkar jota
Txispa bat aurrena
Asmakizun haundina
Mendetan barrena
Sua da ploblema
Zenbait basorena
Edo jaki dena
Berotzen duena
Eta bi begiradek
Sortzen dutena
Egañak azken agurrean txapelketako erretiroa anuntziatu zuen:
...nik erabakia hartu dut
hemendikan lau urtera
nahiz diferentzia badagon
egon jeztetik jeistera
nik erabakia hartu dut
erabakia hauxe da
behien aulkiak aipatzetik
behian aulkiak jartzera.
Txapela Joxe Agirre bertsolariaren eskutik jaso zuen Lujanbiok. Lau bertso kantatu zizkion Agirrek, jendearen txalo artean, hainbeste aldiz kantu lagun izan duenari:
Mila zorion da gorentzi
eman gabe nola utzi
euskal herriko txapela horra
Maialaeni jantzi
ahal dezun artean eutsi
ez dezu meritu gutxi
emakumerik oraindik ez zen
hortara iritsi.
Entzun da bertso ederrik
hau bukatzea alperrik
ez dute falta teknikarikan
sasoi ta indarrik
hemen ez za inor txarrik
hau ez da esan beharrik
pena bat daukat zortzi buru ta
txapel bat bakarrik