Joxe Agirrek jantzi zion txapela Maialen Lujanbiori

Momentu hunkigarri asko izan zituen atzoko finalak eta horietako bat izan zen Andoni Egañak txapeldun berria besarkatu zuenekoa. Andonik nahikoa lan izan zuen malkoei eusten eta azken agurrean umil asko esan zuen, lau urte barru silak jartzera joango zela BECera, hainbeste lan egin duten antolakuntzako kideei beren lana eskertuaz. Eta beste une hunkigarri bat Joxe Agirrek Maialeni txapela jarri zionekoa izan zen. Plazaz plaza elkartzen diren generazio desberdinen arteko lotura irudikatu zuen une horrek. Joxe Agirrek asko beldurtu gabe kantatu zituen lau bertso eta BECeko entzuleek zutik jarrita eskertu zioten bizi guzti batean plazaz plaza egindako lana. Maialen Lujanbioren azken agurrak eman zion errematea egunari. Gaur hala ere jarraipena izango du festa haundi horrek, Udalak harrera egingo baitie Txapelketan parte hartu duten Hernaniko Bertso Eskolako kideei, 19:30etan, Udaletxeko Areto Nagusian.