hernanin Zero Zabor taldeak Zer egin hondakinekin? kale ekintza antolatu du gaurko. Hondakinen inguruan gai ezberdinak lantzen dituzten mahaiak eta erakusketak izango dira goizeko 10:30etatik aurrera, Plaza Berrin, Behemendiko azokarekin batera. Hernanin Zero Zabor taldeak lehendik ere egin izan ditu Autokonpostaren Erakusketak, baina oraingoan modu zabalagoan atera nahi izan du kalera Hernaniko hondakinei buruzko eztabaida. Hori horrela, honako gaiak landuko dituzte: «nora doaz gure hondakinak? Nola hobetu dezakegu hondakin horien gestioa?». Horrez gain, taldeak argi du gaia alde askotatik helduta eztabaidatu daitekeela, baina bere ustetan mamia ezin da ahaztu, hau da, hondakinen orain arteko sistema kutsakorra dela, errrausketa are kutsakorragoa izango dela, eta beste bide osasuntsuago bat antolatu behar dela.
Mahaiak eta erakusketak
Hondakinen inguruan gai ezberdinak lantzen dituzten mahai eta erakusketekin ikusi eta ikasteko aukera izango da; izan ere, han jarriko dira eskura egungo zaborren datuak, Usurbilera egindako bisitaren bideoa, eta baita errausgailuaren funtzionamenduarena ere. Horrez gain, herritarrek autokonposta nola egiten den ikusi eta konpostagailua eskatzeko aukera izango dute, eta banatuko dute hondakinen arazoak hobeto ulertzeko informazioa.