gabonetarako astebete inguru besterik ez da geratzen eta atzotik hasita, Gabonetako ekintzak nagusi dira Hernanin. Gaur, esaterako, ez dira faltako Kalez Kale Kantari, umeentzako antzerkia eta zinea, eta kontzertuak.
Umeentzako emanaldiak
Umeek ondo pasatzeko aukera goizetik izango dute gaur. Goizeko 11:00etan hasita, Itsasminez antzerkia izango da ikusgai Biterin. Eta arratsaldean ere, beste hainbeste, baina antzerkia ordez, zinea izango da: Biterin, 17:00etan.
Musikaz gozatzeko eguna
Gaur nonahi izango da musikaz gozatzeko aukera. Ohi bezala, eguerdiko 12:00etatik aurrera, Kalez Kale Kantarikoak kaleak girotzen ibiliko dira Plaza Berritik abiatuta.
Bi kontzertu ere izango dira 20:00etan. Alde batetik, Debako Aitzuri Abesbatzaren kontzertua izango da Milagrosa aretoan, Kantuz abesbatzak antolatuta. Fernando Urainek zuzenduta, 13 abesti abestuko dituzte, besteak beste: Ave Maria, Jubilate Deo, Goizeko Izarra eta Nerea izango zen. Beste kontzertua Tilosetan izango da ordu berean, Hernaniko Gazte Bilguneak antolatuta.
Gabon kanten jaialdia atzo
Gabon giroa nagusi izan zen atzo, Gabon kanten jaialdian. San Joan Bataiatzailea elizara gerturatutakoek kontzertu zabalaz gozatzeko aukera izan zuten; talde ezberdinetako 500 abeslari inguruk hartu zuten parte: Hernaniko eskolako ikasleek, Musika eskolakoek, eta San Joan Parrokiko, Goiz Eguzkiko eta Ozenki abesbatzakoek.