Hernaniarren ia erdiak atez ateko bilketa ona dela uste du eta Udalak positibotzat hartu du abiapuntua

Hernaniarren ia erdiek, zehazki %46,7ak, atez ateko hondakinak biltzeko sistema ona edo oso ona dela uste dute; %74,3ak uste du ara­zorik ez duela izango sistema berrira moldatzeko; adminis­tra­zioek konpostatzea bultza­tu beharko luketela uste du %77,7ak; aukera dute­netatik %68,8a prest dago bere kon­pos­ta egiteko; eta proposa­tu­tako bilketa ordutegiarekin ados agertu da herritarren %63,8a. Horiek dira Izaskun Txin­txurreta Inguru­men zi­ne­­go­tziak atzoko prentsau­rrekoan azpimarratu zituen datuak, Udalak egin berri duen inkestaren inguruan. «Egia da bide lu­zea dugula lan­tzeko, hasi besterik ez gara egin, baina abiapuntu bezala emaitzak onak dira, gehien­goaren al­de­ko jarrera horrek erakusten digulako herna­niarrak bide­la­gun izango ditugula», azal­du zuen.

Herritarrak «puntako teknologia eraginkorrena»
Ideia berari helduz, Marian Betialarrangoitia alkateak na­bar­mendu zuen argi dagoela herritarrak kontziente direla zaborraren arazoaz eta kon­ponbidea bilatu nahi dutela. Eta gaineratu zuen: «puntako teknologiaz egindako erraus­te plantaren mehatxua gure gainean dugun honetan, esan nahi dut, herritarrak direla puntako teknologia eragin­korrena, eta beraien aporta­zioarekin lortuko dugula zaborraren arazoari behar den erantzuna ematea osa­suna kontuan hartuta».

Kolektibo guztiak kontuan azterketa egiterakoan
Azterketa Aztikerren bidez egin du Udalak, hondakinak atez ate biltzeko sistemaren inguruan, herritarrek dituz­ten iritzi eta jarrerak jaso­tzeko hel­buruarekin. Amaia Eliza­ga­­rate lana­ren zuzen­dariak azal­duta­koaren arabe­ra, «in­kes­ta egin zaie Herna­nin bizi diren 15 urtetik go­ra­ko herri­tarretatik (16.396 per­tsona), 503ri. Telefonoz egin da, auzo guztietara iritsita, eta sexu eta adin ezber­dinetakoak kontuan hartuta. Hala, kolek­tibo guztiak errepresentatu ditu­gu eta saiatu gara Her­naniko ahalik eta argazki afinatuena lortzen». Inkesta bi zatitan egin dute. Alde batetik oroko­rrean galdegin dute honda­kinen gestioari buruz: bereizteko dituzten ohiturak, konpostaren inguruko eta erraustegiaren inguruko jarrera eta ezagutza... Eta bestetik, atez ateko gaikako bilketari buruz: sistemaren ezagutza, ona edo txarra den, jarrera, zintzilikarioak eta ordutegia, kezkak eta beldurrak... Datu guztien berri izan nahi duenak, aukera du txostena lortzeko, Karda­beraz kalean dagoen bulegoan edo udaletxean. Usurbildarren lana Marian Beitialarrangoitia alkateak Usurbilgo eredua ere izan zuen ahotan eta bertako Udalaren eta batez ere, herritarren lana gorai­patu eta zoriondu zuen, eta azaldu zuten, «Usurbilekin eta Oiartzunekin batean, era­kutsiko dugu Gipuzkoan ez dela errausgailurik behar».