Hernaniko Udal Gobernuak atzo jakinarazi zuenez, bere egingo du udal ekipamenduen inguruko herri galdeketako emaitza eta Kultur Gunearen proiektuaren lanketarekin hasiko da 2010ean; izan ere, proiektu honek lortu ditu boto gehien: 1.459. Bigarren Gudarien eta Tilosen plaza eraberritzeko aukera geratu da 538 botorekin; eta azkenik, Igerilekua 290 botorekin. Boto zuriak 9 izan dira, eta baliogabeak 12. Marian Beitialarrangoitia alkatea eta Juan Ignacio Arrieta parte-hartze zinegotzia izan ziren atzo emaitzen balorazioa egiten, eta emaitza positibotzat hartuta, alkateak azaldu zuen, %20ko parte-hartzea gainditu ez arren, Udal Gobernu honek bere egingo duela emaitza osotasunean. Hala arrazoitu zuen: «Udal ekipamenduen gaiari dagokionez, egun dagoen herri borondatearen adierazpen demokratikoena herri kontsulta honen emaitza da. Hori dela eta, adierazpen demokratiko zabalagoa islatzen ez den bitartean, gure erabakiak kontsulta honen emaitzara lotuko ditugu». Arrietak, berriz, azaldu zuen, emaitzei erreparatuz gero, herritarrek Kultur Gunearen aldeko hautu garbia egin dutela, bigarren aukera ia hirukoiztuz: «ez da makala hautu honen zilegitasun demokratikoa, kontuan hartuz, azken udal hauteskudeetan egon den oposizio talde bozkatuenak ere ez dituela lortu bozka horiek».
Kultur Gunea gauzatzean, gainerakoak helburu
Beitialarrangoitiak ere azaldu zuen, Udal Taldeak agintaldi honetan nahiz datozenetan ekipamendu kulturala gauzatzea izango duela helburu nagusi. Eta gaineratu zuen, herri kontsultaren emaitza, hau da, herritarrek erabakitakoa, errespetatuko dutela lehenetsi den ordenean eta «Udal Gobernuaren iparra» izango dela. Hala, Kultur Gunea behin gauzatuta, Plaza eta Tiloak berritzea izango dute helburu; eta azkenik, Igerilekua.
Proiektua lantzeko ere, parte-hartzea bultzatu
Alkateak esandakoaren arabera, berehala hasiko dira urratsak ematen eta 2010ean, bertan, Kultur Gunearen oinarrizko proiektuaren lanketarekin hasiko da Udala. Hala, beharrezkoa izango den diru poltsa gorde beharko dela aipatu zuen. Parte-hartzea oraindik amaitu ez dela ere esan zuen eta proiektuaren lanketa, interesa duten eragile kulturalen parte-hartzearekin egingo dela.
«Kopurua tamainakoa»
Guztira 2.308 hernaniarrek eman dute botoa galdeketan, hau da Hernanin erroldatuta dauden 16 urtetik gorako herritar guztietatik %14,9k. Arrietaren esanetan, 30 urtetan lehenengo aldia da halako kontsulta bat egiten dela eta parte hartutako hernaniarren kopurua «tamainakoa» dela esan zuen. Kontestua kontuan hartu behar dela azaldu zuen: «ez dira ohiko hauteskundeak, jarraipen mediatikoa ere ez da ohikoa, eta horrez gain, kontsultarako gaia ez da polemikoa, Hernani elkarlanean eraikitzera zuzendutakoa baizik». Kontsultak sortu duen herri dinamika ere positiboki baloratu zuen Arrietak.
Eskerrak prozesuan parte hartu duten herritarrei
Marian Beitialarrangoitia alkateak eskerrak eman zizkien herri kontsultan parte hartu duten guztiei eta baita urtebeteko prozesu honetan aurreko faseetan parte hartu dutenei ere. Beraien garrantzia nabarmendu zuen: «nahi dugun etorkizuneko Hernani eraikitzeko ideiak dituzten eta konpromezua duten herritarrak baditugu eta behar ditugu; hor dago gure aberastasuna. Hernanik badu altxor preziatu bat: hernaniarrak».