Joan den igandean, Xake Txapelketa Herrikoiko azken jardunaldia jokatu zen Zumitzan. Zazpi asteren ondoren, amaitu zen txapelketa eta Javier Corral andoaindarra izan zen txapeldun 6 puntu lortuta; bost partida irabazi eta bi berdinduta. Azpitxapeldun Mikel Apezetxea hernaniarra izan zen 5,5 punturekin, eta hirugarrena ere, hernaniar bat izan zen: Breogan Estevez, 5 punturekin. Puntu berdinekin Felix Manso andoaindarra izan zen laugarren; eta atzetik sailkatu ziren, Jesus Navascues, Eneko Martiarena eta Jon Altuna 4,5 punturekin. Ricardo Osa, Ixidro Esnaola, Josu Arrieta, Jose Anjel Ijurko eta Lander Berrueta gazteak 4 puntu lortu zituzten.
Sari ugari
Corralek txapela, trofeoa eta Zumitzan bi pertsonentzako afaria irabazi zituen. Baina sari gehiago ere izan ziren: Berrueta gazteak 18 urtetik berakoen trofeoa jaso zuen, Joseba Goikoetxeak beterano onenarena eta Josu Arrietak federatu gabeko txapeldunarena. Horrez gain, parte hartu zuten 24 jokalarien artean, Axun Larbururen hiru eskultura zozketatu zituen Hernaniko Xake Taldeak.