san Joanen bueltan, azken bi urteetan Garinera hurbildu denak ezagutuko du ziurrenik Sunbilatik Kantuz Kantu taldea. Harizko instrumentuak gainean, ahotsari garrantzia emanda, euskal kantu tradizionalak jo eta abestuta giroa jartzen ibiltzen den laukoteak osatzen du taldea: Hondarribian bizi den Antton Erauzkin zaldibiarrak (ahotsa eta ahoko soinua), Beasainen bizi den Jon Zubeldia aramarrak (gitarra eta hotsa), Juan Carlos Sasso egun Astigarragan bizi den eta Hernanin bizitu izan den argentinarrak (gitarra, banjoa eta kadakinoa) eta Egoitz Maia zumaiarrak (baxua eta koroak). Laukoteak beraien aurreneko diskoa kaleratu berri du. Betiko kantuak izan arren, «ukitu pertsonala» ematen dietela azaldu dio Zubeldiak Kronikari.
7 abestiko diskoa 6 euroan
15 abesti grabatu bazituzten ere, disketxeekin izandako arazaoak direla eta, 7 abestiko diskoa kaleratu dute azkenean. Garin eta Oindi tabernetan daude salgai 6 euroan. Gainera, kontzertu bat ematekotan dira Oindin bertan. Gainerako abestiekin osatutako beste diskoa udara inguruan ateratzeko asmoa dute eta beraiek sortutako bi kantu ere izango ditu.
Sunbilatik... Zumaiara
Taldearen izena nondik datorren galdetuta, hala azaldu du Erauskinek: «Jon eta ni aspaldiko lagunak gara eta orain dela 30bat urte ere kantuan ibiltzen ginen elkarrekin. Denborarekin utzi egin genuen eta orain dela hiru bat urte hasi ginen berriz. Nik Sunbilan ostalaritza eta kanping negozioa nuen eta Jon bixitan etortzen zen. Kantuan aritzen ginen eta egun batean Zumaiako koadrila batekin kantuan bukatu eta hurrengo baterako geratu ginen Zumaian bertan». Orduan batu zitzaizkien Sasso eta Maia.
Ordutik bertan entsaiatzen dute astean behin, eta emanaldiak ia astebururo dituzte herri ezberdinetan. Orain gainera, Argentina dute helburu.