Asetu ederra hartu dute goizuetarrek aurtengo Azaro Kulturalean

Kronika - Erredakzioa 2009ko aza. 28a, 01:00

Badira urte mordoska Goi­zue­tako kultur taldeak Azaro Kulturala antolatzen duela. Aur­­tengoan ere, indartsu joan da, hainbat eki­taldi egin baitira bukatzera doan 2009ko azaroan zehar.

Arte erakusketa Labaderoan
Urriaren bukaera eta aza­ro hasieran, Herna­niko Dobera Euskara Elkar­tearen eskutik, arte erakus­keta egon zen herriko Laba­deroan. Ikusmin handia sortu zuen herrita­rrengan eta hainbat eta hain­bat izan ziren Labaderora hurbildu zirenak artelanak ikustera.

Kuko, Truko eta Bolenwaider
Azaroaren 7an, Udaletxeko Ganbaran pailazo hauen bisita izan genuen. Ekitaldi hau Nafarroako Gobernua­ren es­ku­tik datorren Udazke­neko Bira izeneko antzerki, musika, zinema eta folklore progra­maren barruan dago, berre­hun eta mila arteko biztanle kopurua duten he­rrientzat antolatua. Jendea oso gustora atera zen pai­lazoen ema­nalditik. Beste egun batean ‘Perez Sagutxoa 2’ pelikula jarri zuten Udale­txeko Ganba­ran eta 60 lagun in­gu­ru elkartu ziren filma ikustera.

Umore Ona elkartea sendo Amabirjinetan
´Umore ona` peñaren 50garren urteurrena ospatu bazen, orain ´Umore-ona` elkartearen 25garren urteurreneko ospakizunek hartu dute erreleboa. 247 bazkide biltzen dituen herriko elkarte bakarrak, badu zer ospatua, 25 urte hauetan makina bat ekintza egin baitira elkarte honen izenean. Izen bera daramate herriko pilota eskolak, dantzari taldeak, abesbatzak eta areto futboleko taldeak. Pilota eskola, izen han­diko pilotarien kabi izanda­koa, Angel Salaberriaren gidaritzapean, astero-astero entrenamentuetan jarduten duena. Txapelketa bat baino gehiagotan oso emaitza onak jasotzen ari dira pilotariak. Dantza taldean adin des­ber­­dine­tako herritar ugari bil­tzen dira. Azken urteetan indar handia hartu du fes­tetako dantza ekital­diak. Abesbatza 2006ko irailean sortu zen eta 50 kide inguru ditu orain. Geroztik taldea be­ti prest dago herriko edozein festatan kantari aritzeko. Beraien izenak argi uzten duen bezala, herriko korua beti prest umore ona herrian zabaltzeko. Urte batzuk pasa dira he­rrian futbito taldea genue­netik. Denbora luzez futbito tal­­de­rik egon gabe, 08/09 denbo­raldian herriko mutil talde bat elkartu zen futbi­toan jolasteko Gipuzkoako ligako 3. mailan. Ikaragarria izaten da herrian jokatzen diren partiduetan eskoletako fron­toian sortzen den giroa, eta aur­kako talde asko bat dato­z esanez, Umore Ona «oso talde gogorra» dela he­rrian jokatzen duenean.

25garren urteu­rre­na
Azaroak 21ean, talde guzti hauek elkartu ziren Umore Onaren urteurren festa ospa­tzeko. Talde guztiek argazkia atera ondoren, pilota esko­la­ko pilotarien arteko parti­duak izan ziren, ondoren dantzariek egin zuten ema­naldia eta hunkigarria izan zen abesbatzako kideen ahotsaren erritmora dantza­tu­tako aurreskua. Azkenik, eguneko ekitaldi desiratue­netakoa iritsi zen: Umore Onako lehengo taldekideek, hauetako batzuk 13 urtetan baloirik ukitu gabeak, gaur egungo taldearen aurkako partidua jokatu zuen. Ia taldekide gehienak elkartu ziren egun honetan. 2004tik espetxean dagoen Iñigo Eli­zegiren askatasuna eskatzeko argazkia egin ondoren, bera ere futbito taldeko jokalaria baitzen, partiduari ekin zio­ten. Tentsioa handia izan zen, eta beteranoenek sasoian ja­rraitzen dutela erakutsi bazu­ten ere, gazteenak izan ziren garaile 5-3 emaitzarekin. Jaiari bukaera emateko, herriko trikitilariekin kalejira egin ondoren, egun handi honetako partaide guztiek Umore Ona elkartean afaldu zuten; mus partida eta kan­tuek afalondoa luzatu zuten. Umore ona nagusi elkar­tea­ren urtebetetzean!

Aizkora eta txinga frogak
Hurrengo egunean, Goiko Frontoian zegoen hitzordua, Euskal Herriko 3. Mailako Aizkolari Txapelketako eta Euskal Herriko Emakumez­koen Txinga Txapelketako finala ospatzen zela eta. 33 aizkolaritik 6k zuten lortua Goizuetako finalerako txarte­la, eta azkenean Arkaitz Ola­no, 19 urteko leitzarrak iraba­zi zuen txapela, oso lehia es­tuan. Lehenbiziko 3 sai­lka­tuek 2garren mailan jokatuko dute hurrengo urtean. Emakumezkoen Txinga Txapelketan Esther Iriarte Narbartearrak lortu zuen txapela, bigarrenari 17 plaza atera eta lehiaketako marka berria ezarrita. Txapelketa leporaino betetako Goiko frontoian jokatu zen, 400 ikusleren begiradapean.

Atzo Xalto eguna eskolan
Urtero bezala, San Andres egunaren bezperatan, eskola­ri izena ematen dion herriko bertsolariaren omenezko egu­­na ospatu zen eskolan. Andres Narbarte Xalto ezin­nez ezagunagoa, bertsolaria zen eta famatu egin zen 1962ko Euskal Herriko bertso txapelketa nagusian, Fabiola erregina nor zen jakin ez, eta hala moduz erantzun zuen puntu bategatik. Gaur egun, Goizuetako es­kolan Xalto eguna ospatzen da, bertsolaritzaren inguruko ekitaldiak burutuz. Atzo ikasleek ´Inaxito, galtzago­rriei to!` antzerkia ikusi ahal izan zuten goizean, eta ondoren bertso antzerkia eta bertso eskolako ikasleen ema­naldia eta bertso paper le­hiaketako sari banaketa izan ziren arratsaldean.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!