Oinarrizko Proiektua onartuz gero, administrazio lanak hasteko prest

abiadura Haundiko Trena, Urnie­ta eta Hernani bitartean nondik-nora joango da? Eta zein ezaugarri izango ditu? Trazatu hori orokorrean des­kriba­tzen duen agiria Udalean dago, joan den hileko 16tik. Euskal Auto­no­mia Erkidegoko Trenbide Sare Berriaren Plata­for­maren Oinarriz­ko Proiektua. Urni­e­ta­-Hernani tar­tea izena du agiriak, zehazki. Oina­rrizko Proiektu hori Eusko Jaur­laritzako Garraio eta Herri Lan Sailburuor­detzak bidali zion Udalari; helburua, udal­batzak horren inguruko txosten teknikoa egitea; hau da, pro­i­ektuari buruz aurretik eginda zegoen In­for­mazio Iker­keta eta oraingo Oinarrizko Proiektu hori bat ote datozen egiaztatzea. Jaurlaritzaren esanetan, «Oinarrizko Proiektuak helburua du, egokia dela erabakitzen bada, lehendabiziko lanak hastea, eraikuntza kudeatzen duen Administrazioaren aldetik: Desjabetze Espedientea (expropiazioa), azkeneko Koordinazioa egitea inplikatuta dauden Erakunde eta zerbitzuekin, baimenak eta administrazioen arteko akordioak ze­haztea, eta abar».

Informazio Ikerketatik zenbait aldaketa
Goian aipatutako Infor­mazio Ikerketa horren onarpen tek­nikoa, Sustapen Ministerioko Azpi­e­gitura eta Ga­rraioen Estatu Idaz­karitzak egin zuen, 1998ko maiatzaren 27an, eta era­bateko onarpena, 2000ko azaroa­ren 24an egin zen. Jaurlaritzak Udalari bidalitako dokumentuak dioenez, «ondoren, 2003ko urrian, ADIFek Urnieta-Her­nani tartearen Oinarrizko Proiektu bat erredaktatu zuen, zehazten zuena, Hernaniko zein etxebi­zitza eta negoziok jasango zuten afekzio larria». 2006ko apirilaren 24an, Jaur­la­ri­tzak Euskal Trenbide Sareari agindu zion, Euskadiko Trenbide Sare Be­rria­ren Plataformaren Eraikitze Proiektu berri bat erredaktatzeko, Urnieta-Hernani tarterako, «aurreko proiektua eguneratzeko asmoz». Horrez gain, dokumentuak dio, lehen aipa­tutako eraikinak ahalik eta gutxien afektatzea funtsez­koa jo dela trazatua zehazterako­an: «hala, traza­tua behar bezainbeste mugitu ahal izan da, eta horrela, Urumea gaineko bidezubiraino doan trazatuak behartu ez dezan eraikin horiek desjabe­tzea. Bidezubiaren pilareen altuera eta kokapenaren bidez ere, etxebi­zitza eta negozio horiek jasan ditzaketen afekzioak murriztu nahi izan dira». Baita ere dio, proposamenak lurzoruan duen trazatuari esker, Azkono­bieta Baserriak eta Urnieta udalerriko hagin bakarrak jasan lezaketen «afekzioa saihestu» ahal izan dela tartearen hasieran.

Urnietatik Hernanira tunelean iritsiko da
AHTa Dokumentuan proiektuaren deskribapen orokorra ere biltzen da. Horren arabera, proposatutako trazatuak, Urnieta-Hernani tarteak, 5.250 m inguruko luzera du, eta GI-131 errepidearen (Andoain-Donostia) ekialdetik 230 metrora hasten da, gutxi gorabehera, Urnietako udalerrian. Abiadura Haundiko Trena, Urnietatik tunelean iristen da Hernanira, Azkonobieta Baserritik 42 metrora hegoaldetik, eta 330 metrora Urnietan dagoen hagin bakarretik. Ondoren, Uban errekaren gainetik pasatzen da, 170 metroko luzerako zubi batean, eta Hernanin sartzen da. Trazatuaren ardatza 22 metrora doa Gure Ametza etxebizi­tzaren mendebaldetik. Trazatuak aire zabaleko tarte batean jarraitzen du 780 metroko luzera duen Urumea ibaiaren gaineko bidezubiraino. Bi bidezubien artean kokatutako eremu horretan, aurreikusita dago bi bide lehengoratzea eta drainatze-obra bat jartzea 3+230 km-puntuan kokatutako ibar-bidean.

Ibarluze industriagunea eta Altzueta sagardotegi inguruaren gainetik
Urumea ibaiaren gaineko bidezubiak gainetik zeharkatuko ditu Altzueta-Iparragirre-Elorrabi sagardotegien lu­rrak, Urumea ibaia bera, eta Ibarluze industrialdea (sagardotegiak bidezubiaren ardatzetik 16 metrora geratzen dira). Ibarluzen, Arraun elkarteko eraikina harrapatuko du pilare batek. Urumeako bidezubia tunelean sartuko da hor, Hernaniko tunela deitu diotenean (769 metroko lu­zerakoa); tunelaren beste aldean, iparraldeko muturra Urumeako Autobidearen azpitik pasa­ko da, hori ahalbidetzen duen egitura baten bidez. Egitura hori Uru­mea­ko Autobide horren Eraikitze Proiek­tuan dago sartua. 4+950 km-puntuan, ibarbide baten azpian pasa­tzen da meatze-tunelean, «soilik 6,4 metroko sabaia izango du». Horre­gatik, eremu horretan badaezpadako neurri bereziak hartu beharko direla aipatzen da dokumentuan. Trazatua 5+248,894 km-puntuan amaitzen da, Zumaiberri etxearen parean, eta bertan lotzen da hurrengo tartearekin (haren Eraikitze Proiektua erredakzio fasean dago gaur egun).