atez Ateko Hondakin bilketa bertatik bertara ezagutzeko Udal ordezkariak Usurbilen izan ziren atzo, bertako Udalak gonbidatuta, atez ateko sistema bertatik bertara ikusten, herritarrekin hitz egiten eta azalpen praktikoak entzuten.
Bertatik bertara
Xabier Mikel Errekondo Usurbilgo Alkateak egin zien harrera. Ondoren, kalera atera, eta besteak beste, Imanol Azpiroz Usurbilgo zinegotzi eta San Markoseko Mankomunitateko lehendakariordearen gidaritzapean, hondakin bilketarako jarritako hainbat gune ezagutu zituzten, eta zintzilikarioak jartzeko garaian erabilitako irizpide batzuk azaldu zituen: garrantzitsuenetako bat, «etxetik ahalik eta gertuen jartzea».
Herritarrekin tertulian
Bisitariek aukera izan zuten zabor biltzaileekin, herritarrekin eta Patri jatetxeko Yone Izetarekin hitz egiteko. Kontu praktikoez aritu ziren, esate baterako, egun bakoitzean zein zabor mota atera gogoratzeko hozkailuan jarritako pegatinaz edo arrain usainaz.
Patri jatetxearen esperientzia
Patri jatetxeak bere esperintzia azaldu zuen: «egia da guk lekua dugula eta zerbait moldatu eta nahikoa izan dugula. Kaleak lehen baino garbiago daude orain».
Larrialdi gunea
eta informazio gunea
Bisita goiz osoan zehar luzatu zen eta larrialdi gunea eta informazio gune bat ere bisitatu zituzten, besteak beste.
Gobernu Taldea besterik ez
Gobernu Taldeko ordezkariak besterik ez ziren joan Usurbilera, beste alderdietako ordezkaririk ez zen joan, gonbitea denei luzatu zitzaien arren. Ordezkari politikoez gain, teknikariak eta atez atekoaz informazio lanean ariko diren pertsonak ere joan ziren.