Astigarragako Udaletxeak urriaren 9ko plenoan Ergobiako ibilbideko plan orokorra onartu zuen. Beraz, behin-behineko onarpena zuten eta Gipuzkoako Foru Aldundiak lizentzia emateko zain zeuden. Hau izan zen azken pausua, urriaren 20ean eman zena, eta baiezko borobila jaso zuten. Honela, hain luze iraun duen prozesu honek behin-betiko lizentzia jaso du. Gobernuak pozez hartu du azken onarpen hori, eta euren hitzetan `plan honi esker geuk, astigartarrok, erabaki ahal izan dugu eraiki nahi dugun Astigarraga `. Baimen hori lortuta, plana aurrera eramateari ekingo diote laister. Horretarako, 94.000 metro karratuko azalera erabiliko da, Astigarragako Bidebitarte industriagunetik Ergobia auzoraino doan lur eremua, hain zuzen ere. Lur zati horretan, 800 etxebizitza, Kultur Etxea eta bi eraikin berezi eraikiko dira.
Lana hiru fasetan egingo da
Lehendabiziko fasean, etxebizitza mota ezberdinak eraikiko dira. Lehenengo eraikinak, itundutako 120 etxebizitza libre izango dira eta hauen inguruan egingo diren supermerkatu, parkea, eta abar. Hau guztia, bi urte barru bukatuta egotea espero da. Ondoren, babes ofizialeko 160 etxe egingo dira. Eta azkenik, Kultur Etxea.
Bigarren fasean, gainontzeko etxebizitzak eraikiko dituzte, beraz, 500 inguru. Hauek, ordea, salmenta askekoak izango dira.
Azkeneko fasean, hau da, hirugarrengoan, bi eraikin berezi egingo dira; bata, hotela bilakatuko dena, eta bestea, zenbait bulego jasoko dituena.
Kultur Etxearen
nondik norakoak
Udala eta eraikitzaileen artean hitzarmen bidez erabaki da Kultur Etxe berria eraikitzea. Kultur Etxe barruan zer eskainiko den oraindik guztiz zehaztuta egon ez arren, bertan eskaini nahi diren zerbitzu zein guneak hauek dira: liburutegia, bilera gela bat, batzar zein erakusketa txikientzako gela, biltegia, euskaltegia, dantza gela, eskulanetarako gelak, entzutegi handi bat, KZgunea (gazteei zuzendutako informazio gunea), orain Kale Nagusiko 23.ean kokatzen den gaztelekua; eta azkenik, kiroldegi azpian dagoen Musika Eskola. Hau da, oraingo Kultur Etxean jasotzen diren zerbitzuak eta beste batzuk bilduko dira Kultur Etxe berrian. Horregatik, 3.500 metro karratu inguruko azalera bideratuko da horretarako.
Gabeziak asetze aldera
Kultur Etxe berri hau eraikitzearen ideia orain dagoenaren gabeziak asetu nahiean sortu zela azaldu digute Kultura Sailetik. Eremu horretan eraikitzeko aukera eman zitzaienean, kultur ekintzak leku berean biltzea egokia izango zela pentsatu zuten. Lehen esan bezala, orain jasotzen direnak eta baita KZgunea zein Musika Eskola ere. Beste alde batetik, gaztelekua bertara eramateko asmoa dago, baina oraindik ez da guztiz hitzartu gazteekin. Beraz, aukera emango balitz hau ere bertan bilduko litzateke.
Auditorio baten beharra
Hau guztiaren gainetik, ideia mugitu zuena entzutegi edo auditorio baten beharra izan zen. Euren ustez, entzutegi honen beharra ez da soilik kultur arlokoa, baizik eta herriko gabezia bat. Esaterako, ikastolak ez du horrelako leku publiko bat bilera handi bat egin ahal izateko; beraz, ez da oraingo Kultur Etxea txikia gelditu izana arrazoi nagusia, ekitaldi handi bat eskaintzeko baldintzak ez betetzea baizik.
Ideia lehiaketa
Kultura arduradunaren esanetan, hau guztia nola gauzatu daitekeen erabakitzeko ideia-lehiaketa bat egingo da, kulturan dauden beharrak azaldu eta arkitektoek eraikitzeko ideiak emango dituzte. Ideia guztien artean egokiena dena aukeratuko da. Lehiaketa hau nola egingo den oraindik erabakitzear dago. Hala ere, ia segurua da lehiaketak prozedura irekia erabiliko duela.
Finantziazioa, eraikitzaileen esku geldituko da. Ekipamendua ez, baina proiektua eta eraikina eurek finantziatuko dute. Kulturakoek aspalditik zuten Kultur Etxe berria eraikitzeko nahia, baina dirua zen arazo. Horregatik, aukera eskaini zitzaienean sortu zen ideia berri hau. Azkenik, lehiaketa bukatzen denean eta ideia egokiena aukeratutakoan, herri-kontsulta egingo dela ziurtatu digute Kultura Sailekoek, nahiz eta hau ez den binkulantea izango.