hernaniko Bertso Eskolako hiru kideek, Maialen Lujanbiok, Aitor Mendiluzek eta Beñat Gaztelumendik erakustaldia eman zuten atzo, Bergaran izan zen finalerdietako aurreneko saioan. Hasiera-hasieratik nabarmendu ziren hirurak, eta duten gaitasuna erakutsi zuten. Maialen Lujanbio izan zen, zalantzarik gabe, saioko onena. 708,5 puntu lortu zituen, eta zuzenean pasa da Donostian izango den bigarren itzuliko finalerdira. Aitor Mendiluzek, Gipuzkoako Txapeldunak, bere mailari eutsiz, bigarren postua lortu zuen, 680 punturekin. Beñat Gaztelumendi, Gipuzkoako txapeldunordeak, hirugarren postua eskuratu zuen, 644,5 punturekin. Mendiluzek eta Gaztelumendik, gainontzeko bertsolariek bezala, puntuazioaren arabera lortuko dute finalerdietako bigarren itzulirako txartela. Atzoko saioko gainontzeko bertsolarien puntuazioa ondorengoa izan zen: Jon Martinek 619 puntu, Etxahun Lekuek 608,5 puntu, eta Fredi Paiak 596 puntu.
Iñaki Zelaiak gaur izango du finalerdietako bertsosaioa Gasteizen
IÑAKI Zelaia bertsolari hernaniarrak gaur izango du finalerdietako aurreneko saioa Gasteizen. Aurreneko itzuliko bigarren saioa izango da, eta aurrean izango ditu honako bost bertsolariak: Unai Iturriaga, Miren Amuriza, Arka-itz Estiballes, Xabier Paya eta Maddalen Arzallus. Sarrerak bertan izango dira salgai, 16:00etatik aurrera.