aurten ere San Martin eguna ospatuko dute Aranon. San Martin eguna berez asteazkenean da baina Aranoko ospakizuna pittin bat aurreratu dute eta gaur ospatuko dute. Arratsaldeko jaia izango da.
Aranoko etxe eta bazterren argazki emanaldia,
Jabier Legarretaren eskutik
Arratsaldeko 18:00etan hasiko da ospakizuna txotxongilo emanaldiarekin, San Roke elkartean.
Arratsaldeko 19:00etan Aranoko etxe eta bazterren argazkiak erakutsiko ditu Xauxarko Jabier Legarretak. Udaletxeko Ganbaran izango da ekitaldia. Jabier Legarreta, Aranoko semea, Hernanin bizi da eta tarteren bat duenean, besteak beste, Aranoko baserri, etxe, txoko, paraje eta abarren argazkiak egiten ditu. Lau urte eman ditu hango eta hemengo bazterrak kamararekin jasotzen.
Meza eta talo jatea ondoren
Argazki emanaldiaren ondoren, meza izango da, eta ondoren, talo eta gaztain jatea, trikitilariek lagunduta. Aranoarrak dei egin dute jaian parte hartzeko.
Aranoko argazki lehiaketa
Jaiaz gain, Aranoko bigarren argazki lehiaketa ere antolatu dute. Lehiaketara edozein argazki aurkeztu daiteke, berdin da zaharra edo berria izan, eta gaiak Arano izan behar du.