astebeteko atsedenaldiaren ondoren, gaur helduko zaio berriro ere Bertsolari Txapelketa Nagusiari. Gaur eta bihar finalerdiko lehenengo saioak izango dira. Guztira 24 bertsolari arituko dira lehian; final laurdenetan aurrera egitea lortu zuten 17 bertsolariak eta 2005eko 7 finalistak. Tartean dira Hernaniko Bertso Eskolako Maialen Lujanbio, Aitor Mendiluze, Beñat Gaztelumendi eta Iñaki Zelaia. Lehenengo hirurek gaur izango dute saioa Bergaran. Zelaia, berriz, bihar ariko da Gasteizen.
Lehenengo itzuliko aurreneko saioa gaur
Finalerdiak bi itzuli izango ditu eta lehenengo itzuliko aurreneko saioa gaur izango da Bergaran, Labegaraieta Kiroldegian, arratsaldeko 17:30etan.
Sei bertsolari ariko dira: Aitor Mendiluze, Maialen Lujanbio, Beñat Gaztelumendi, Etxahun Lekue, Fredi Paia eta Jon Martin. Bertan, 250 sarrera jarriko dituzte salgai 16:00etatik aurrera.
Bihar Zelaia Gasteizen
Lehenengo itzuliko bigarren saioa bihar izango da Gasteizen, Europa Pabilioian, arratsaldeko 17:30etan. Bertan Iñaki Zelaia hernaniarra ariko da honako bost bertsolariekin batera: Unai Iturriaga, Miren Amuriza, Arkaitz Estiballes, Xabier Paya eta Maddalen Arzallus. Salgai izango dira sarrerak bertan, 16:00etatik aurrera.
Bi itzuli finalerdietan
Bi itzuli izango ditu finalerdiak. Lehenengo itzuliak lau saio izango ditu. Saio bakoitzeko irabazleek zuzenean bigarren itzulirako txartela eskuratuko dute eta beste 14 bertsolari puntuazioaren arabera sailkatuko dira.
Bigarren itzuliak hiru saio izango ditu eta 18 bertsolarik hartuko dute parte. Lehen eta bigarren itzuliko puntuazioak gehitu ondoren puntuazio altuena lortzen duten 7 bertsolariak sailkatuko dira abenduaren 13an Andoni Egañarekin BEC-en jokatuko den finalerako.