Hernaniko oposizioko alderdi guztiek, PSE-EE, Hamaikabat, Ezker Batua, PP eta EAJ-PNVk, eskatu diote Alkateari ez ohizko plenoa deitzeko azken egunetako «kontu larrien» inguruan azalpenak emateko. Kontu horien nondik norakoak Hernaniko Kronikara bidali dituzte, aipatutako alderdi guztiek sinatutako prentsa ohar baten bidez.
Kontratazio Teknikoak
aurkeztutako txostena
Oposizioko alderdiek prentsa oharrean adierazten dutenaren arabera, Kontratazio Teknikoak txosten bat aurkeztu du, non esaten duen ilegala dela kontratatzea Zuzendaritza Batzordeko kidea den norbaiten enpresa: «Kontratazio Teknikoak informe bat egin du esanaz, Zuzendaritza Batzordeko kide baten enpresa kontratatu dela, eta enpresa honen fakturak azaldu direla Kirol Patronatuan eta Udalean. Guk ondorengoa jakin nahi dugu: Zergatik kontratatu dute argindar enpresa bat, jabeetako bat Kirol Patronatuko kide dena, legez kanpo? Gobernu Taldeko zein kidek hartuko dute bere gain erantzunkizun politikoa?»
Zaharren Egoitzari buruz
Prentsa ohar berean, gaia aldatuz, azaltzen dute orain dela 3 urte Zaharren Egoitza zaharraren inguruko planing-a aldatu egin zela; haren helburua zen obrek ahalik eta eragin gutxien izatea bertan bizi ziren aiton-amonengan: «Guk eskatzen duguna da, Gobernu Taldeak azaltzea nork hartu zuen erabaki hori, eta zein izan ziren arrazoiak».