azaroa iritsi da eta hilabete honetarako ere makina bat ekintza antolatu ditu Gazte Txokoak. Betiko tailerrak, tailer berriak, irteerak eta beste hainbat kontu izango dituzte gazteek.
Tailer berriak
Gazte Txokokoek adierazi dutenez, tailerrek normalean izaten duten arrakasta ikusita, eta gazteek beraiek eskatuta, sukaldaritza (azaroak 5) eta txapa tailerra (azaroak 18-19) errepikatzeko asmoa dute.
Eta horiez gain, azaldu dute, «tailer berriak planteatuko dira, ikasturte hasiera honetan tailerrek eta eskulanek gazte askorengan sortu duten interesa ikusita». Tailer berri horiek izango dira kristalezko platerak (azaroak 11-12) eta teiak apaintzeko tailerra (azaroak 25-26). Lehenengo kasuan, marrazki ezberdinak dituzten serbiletak erabiliz kristalezko platerak apainduko dituzte; eta bigarrenean, teiak hornitzeko aukera izango dute dimentsio ezberdinak irudikatzen dituzten marrazkiekin.
Alkoholaren inguruko saioak
Azaroan zehar ere, alkoholaren gaia lantzeko asmoa dutela jakinarazi dute. Horretarako, gazteen errealitatea ezagutzeko eta horren inguruan eztabaidatzeko saio batzuk antolatu dituzte azaroaren 7an eta 14an. Gaiaren inguruan gehiago sakontzeko, bi pelikula izango dira lokalean: Kids eta Elephant.
Karsetara eta patinatzera
Irteerei dagokienez, azpimarratzeko bi irteera egingo dituztela azaldu dute. Azaroaren 20an Olaberriara joango dira Karsetan ibiltzera eta azaroaren 8an Txuri-Urdinera patinatzera. Karsetan ibiltzeko asmoa dutenek izena emateko azken eguna azaroaren 5ean izango dute.
Zenbait lehiaketa
Zenbait lehiaketa ere izango dira azaroan, hala nola, futbolin txapelketa, play station txapelketa... Eta horrez gain, lokalak berak eskaintzen dituen ohiko baliabideez gozatzeko aukera izango da. Bertan daude jokoak, musika, wifi gunea, pinpon mahaia, aldizkariak...
«Interes gune garrantzitsua, eskulanen arloa»
Urriko ekintzen inguruan, Gazte Txokoko hezitzaileek nabarmendu nahi izan dute, «eskulanek, oro har, izan duten harrera ona», eta gaineratu dute, «gazte askoren interes gune garrantzitsua bihurtu da eskulanen arloa».
Hezitzaileek baita ere aipatu dute, urrian antolatutako larruzko pultsera, belarritako eta txapa tailerrek arrakasta haundia izan dutela eta gazteak oso gustora aritu direla. Horrez gain, hilabete osoan zehar nagusitu den «giro atsegina» azpimarratu dute
Azaroko egitaraua prest Gazte Txokoan
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!
Egin zaitez KronikaKide!