Hernaniar bat Aita Santuaren artzain-kapilau

Cesareo Gabarain izena, agian, ez da ezagunegia gaur egun Hernanin, baina 1979ko martxoaren 29an, garaiko zenbait egunkaritan albiste izan zen. Izan ere, Juan Pablo II.a Aita Santuak bere artzain-kapilau izen­datu zuen musika erlijio­soan egindako lanagatik. Ha­­la azaltzen dute El Dia­rio Vasco eta La Voz de España de San Sebastián egunkariek. Adimen eta ikasketa haundiko apaiza Gabarain Hernanin jaio zen 1936ko maiatzaren 16an. Ikasketak hainbat lekutan burutu zituen: Donostian, Zaragozan, Madrilen, Pari­sen eta Erroman, eta arlo ezberdinetan zuen doktore­tza eta lizentziatura. Teologia biblikoan eta musikologian doktoratua zen eta filosofia, teologia moralean eta kazetaritzan lizentziatua. Apaiz gisa Donostian eta Antzuolan aritu zen eta azken urteetan Madrilera joan zen bizitzera. Hala ere, oporretan Antzuolara itzul­tzen zen pelotan jokatzera. Bertan, oso maitatua zela azaltzen dute aipaturiko egunkariek, baina berak harro­tasun haundiz alda­rrikatzen zuela gipuzkoarra eta hernaniarra zela. Kirolari oso lotua egon omen zen eta txirrindulari­tzan ´txirrindu­larien apai­za` izenez zen ezaguna. Dena dela, horren guz­tiaren gainetik, garaiko mu­sika er­lijiosoan egindako ekarpe­nagatik nabarmendu zen. Juan Pablo IIgarrenaz gain, Pablo VIgarrena Aita San­tuak ere bere musika obrenganako in­teresa azal­du izan zuen, behin baino gehiagotan.