mundu bat elkarteak giza eskubideen aldeko topaketa egin berri du Donostian eta gaurko, Honduras zutik hitzaldia antolatu du Hernanin. Hizlaria Betty Matamoros izango da, Honduraseko Estatu kolpearen aurkako frontearen nazioarteko arduraduna, eta Bloque Popularreko kidea. Matamorosek azalduko du estatu kolpearen nondik norakoa eta kolpearen ondorioz egoera nola dagoen Hondurasen. Ameriketan, oro har, izan duen inpaktua ere azalduko du. Hitzaldia Biterin izango da eta arratsaldeko 19:00etan hasiko da. Matamorosek orduerdiko azalpena emango du eta ondoren, galderak egiteko aukera izango da.
Garrantzitsuena
informazioa zabaltzea
Matamorosek Kronikari azaldutakoaren arabera, mugimendutik enfokatutako ikuspuntua emateko aukera dute foro eta hitzaldi hauen bidez eta bere ustez, «garrantzitsuena hori da, han gertatzen denaren informazioa zabaltzeko aukera izatea».
Hemengo hedabideetan Honduraseko egoerari buruz zabaltzen den informazioa egokia den galdetuta, Matamorosek dio iturri ofizialek «errealitatea ezkutatzen» dutela. Horrez gain, azaldu du, beraiek ez direla, esaten den bezala, presidentearen aldekoak, baizik bake prozesuaren aldekoak. «Eta noski, herriak aukeratutako presidentea onartzen dugu».
Hitzaldira joateko bi arrazoi
Matamorosen esanetan, gaur Hernanin izango den hitzaldira joateko bi arrazoi badira, gutxienez. Alde batetik, «gure benetako egoera zein den jakiteko eta giza eskubideak urratu zaizkigula zabaltzeko bidea izango da» eta bestetik, «ia beti gizonezkoak dira politikaz hitz egiten dutenak eta kasu honetan emakumezkoa izango da, gure herrian oso mugatua dagoen aukera».