amnistiaren Aldeko Mugimenduak prentsaurrekoa eman zuen atzo Hernanin, joan den asteko atxiloketen inguruko balorazioa egiteko eta egungo egoera politikoaren azterketa egiteko. Bertan izan ziren atxilotuak eta espetxeratuak izan ziren pertsonen senideak, atxilotu eta aske utzi zituzten pertsonak eta abokatuak, besteak beste.
Estrategia errepresiboa
Joan den asteko bi polizia operazioen inguruko iritzia eman zuen AAMk: «estatuak bere bide errepresiboan urratsak ematen jarraitzen du. Urrats errepresibo bakoitzak, polizia operazio bakoitzak, helburu eta jomuga argia du: Euskal Herrriaren aldaketa politikoa eta demokratikoa galaraztea». Erantsi zuen, «aspaldian baino gardenago eta gordinago» jotzen duela errepresioak. AAMren esanetan, «astearteko operazio polizialaren atzean operazio politiko argia dago».
Elkartasuna ezabatu nahi
AAMk aipatu zuen ostiralean espainiar Entzutegi Gorenak Askatasuna eta Amnistiaren Aldeko Batzordeei zegokien epaia eman zuela, hamar eta zortzi urte arteko espetxe zigorrak, «eta ondorioz zortzi euskal herritar atxilotuak eta espetxeratuak izan ziren». Adierazi zuenez, «Estatua errepresio politikoa eremu berrietara hedatzen ari da, baita intentsitatez igotzen ere».
Egoeraren argazki zehatza
Adierazi zuten atxiloketek Euskal Herrian bizi den egoeraren argazki zehatza eskaintzen dutela, «errepresio politikoa da espainiar gobernuak, frantziar gobernuaren laguntzaz, Euskal Herriari egiten dion eskaintza politiko bakarra».
Bi egoera posible
AAMren arabera bi dira Euskal Herrian eman daitezkeen egoerak: «gerra eta errepresio egoera edo prozesu demokratiko baten bidez etorriko den bake eta konponbide egoera». Bere esanetan «argi dago espainiar gobernua bi egoera hauetatik non kokatzen den. Bestaldean gaude errepresio eta gerra egoera gainditu eta Euskal Herrira demokrazia eta bakea ekarri nahi ditugunak».
Horretarako esan zuten, behar beharrezkoa ikusten dutela herritarren mobilizazioa, eta zentzu horretan balorazio oso positiboa egin zuten joan den larunbatean Donostian egindako manifestazioarena.