Aste honetan hasiko da atez ateko bilketaren parte hartze prozesua, eta ostegunean bertan, Marian Beitilarrangoitiak herritarrei azalduko die prozesuaren egutegia eta metodologia. Alkateak Kronikara bidalitako prentsa oharraren bidez, herritarrei aurreratu nahi die osteguneko plenarioan azalduko duena eta bertara hurbiltzeko deia luzatu die.
Parte hartze prozesuak
bi hilabete iraungo du
Prentsa oharrean adierazitakoaren arabera, parte hartze prozesuak bi hilabeteko iraupena izango du, urriaren 22tik abeduaren 22ra. Bilera horietan emango da hondakinak biltzeko sistema berriari buruzko informazioa, eta herritarrek dituzten zalantzak azaltzeko aukera ere izango dute: «parte hartze prozesuaren helburua da, atez ateko bilketari buruz edozein zalantza, kezka edo proposamen duenak, hauek planteatzeko gunea izatea».
Jakinarazi duenez, parte hartzea ahalik eta zabalena izan dadin, 16 bilera eta 4 plenario izango dira. Horrez gain, auzo bakoitzean bi bilera, eta dendari eta baserritarrekin aparteko bilerak ere egingo dituzte.
Herritarrei deialdia
luzatu die Alkateak
Parte hartze prozesua hastear dela kontuan izanda, Alkateak deialdia luzatu die herritarrei prozesuan parte hartze aktiboa eta irekia izan dezaten: «parte hartze prozesuak finkatuko du Hernanin nola egingo den atez ateko bilketa, bertan hainbat erabaki garrantzitsu hartuko dira. Guretzat oso garrantzitsua da atez ateko bilketarako jauzia ondo ematea. Nahi dugu herritarrentzat ahalik eta modu errazena eta erosoena izatea, eta horretan ahalegin haundia egiten ari gara».
`Aukera... tú´ leloa
Oharrean adierazitakoaren arabera, prozesuak lelo propioa izango du, Aukera... tú eta horren bidez herritarrengan duten konfiantza erakutsi nahi dute: «herritarrek erabakiko dute bilketa nola egin eta auzo bakoitzean komeni zaizkien irtenbideak aurkituko dituzte»
Orain arteko kritikei erantzuna
Alkateak ateaz ateko bilketak orain arte jaso dituen kritikei erantzuna ere eman die oharrean: «gaur egungo hondakinen bilketa ereduak ez du hondakinen arazoa konpontzen. Alderantziz, sistema bera da arazoa, bilketa modu horrek ez duelako birziklatze mailarik bermatzen eta herritar guztien osasuna arriskuan jartzen duelako. Atez ateko bilketa ohitura aldaketa bat da, aldaketa haundia, baina onerako. Horrela bakarrik bermatzen da herritarren osasuna. Ezin dugu orain arte bezala jarraitu, gero eta hondakin gehiago sortzen, zabortegiak betetzen eta errausketa bezalako tratamendu finalistak bideratzen. Hondakin kudeaketa eta, bereziki bilketa, oinarrizko kontua da eta orain badakigu ondo egin dezakegula. Hor dago Usurbilgo adibidea. Hernanin ere hondakinen %80 birziklatzea lor dezakegu. Atez ateko sistemarekin herritarren osasuna zaintzen ari gara».