euskal Herriko sei sindikatuk, ELA-LAB-ESK-STEE/EILAS-EHNE eta HIRUk, krisia borrokatzeko eta ekonomia eta gizarte eredu berri bat lortzeko prestatu duten dekalogoa aurkeztu zuten atzo, Biterin emandako prentsaurrekoan. Iker Urruzola ELAko ordezkariak eta Joxe Atxe LABeko ordezkariak azaldu zutenaren arabera, «maiatzak 21eko greba orokorraz geroztik, krisiaren ondorioak larriagotu egin dira, patronalak lehen baino bortitzago egiten dituelako bere eskakizunak» eta horrez gain, Gobernuek egoerari erantzuten ez dioten politikak aplikatzen jarraitzen dutela gaineratu zuten. Hori horrela, egoera aldatuko duen hamar neurri bildu dituzte eta dei egiten diete Gasteiz eta Iruñeako gobernuei eta Foru Aldundiei, epe laburrean neurri horiek hartzera.
Hamar urrats «gauzagarri»
Sindikatuek azaldutakoaren arabera, dekalogoak biltzen dituen hamar urratsak «benetako borondate politikorik balego guztiz gauzagarriak lirateke».
Honakoak dira dekalogoa osatzen duten urratsak labur azalduta:
1.- Langileak ez aise kaleratzea eta enplegu honen kalitatea hobetzea.
2.- Lan baldintzetan berdintasuna bermatzea.
3.- Prestazio sozialak ugaltzea.
4.- Zerga politika bidezkoa eta progresiboa ezartzea.
5.- Osasun eta hezkuntzaren gastu publikoa igotzea.
6.- Zenbait eskubide legez onartzea.
7.- Sektore publikoa bultzatzea.
8.- Askatasun sindikala bermatzea, gehiengo sindikalak errespetatzea eta greba eskubideari oztoporik ez jartzea.
9.- Politika ekonomiko eta sozialen diseinuan parte hartze soziala sustatzea.
10.- Lan Harremanetarako eta Babes Sozialerako Euskal Esparrua bultzatzea Hego Euskal Herrian lege propioak izan ditzagun.
Gizarteratu eta sinadurak bildu
Sindikatuek dekalogoa zabaltzeko, kanpaina egingo dute urte bukaera bitartean. Beren erreibindikazioa gizarteratzea dute helburu eta babesa emango dioten sinadurak biltzea. Horretarako, sei sindikatuek ordezkaritza duten enpresetan batzarrak egingo dituzte eta ordezkaririk ez duten enpresetan ere ahaleginduko dira asanbladak egiten bertako ordezkariekin. Sinadura bilketa lehenik langileengana zuzenduko da baina kalera ere zuzentzea pentsatzen dute.
Sinadurak Gasteiz eta Iruñeako gobernuetan aurkeztuko dituzte kontuan hartu ditzaten. Abendura bitartean bi kontzentrazio ere egingo dituzte, baina zehazteko daude.