urtero bezala, Hernaniko Amher-Sos Arrazakeria taldeak Aste Multikulturala antolatu du. Integrazioa, berdintasuna, elkartasuna eta aniztasuna bultzatzea helburu duen Aste Multikulturala gaur hasiko da Virginia Imazen ipuin kontaketarekin. Imazek La Memoria del fuego antzezlanaren bidez, ipuinak kontatuko dizkie helduei. Emanaldia Biterin izango da gaur, arratsaldeko 19:00etan.
Ostegunean arrazakeriari buruzko hitzaldia
Etzi, ostegunean, emango zaio jarraipena Aste Multikulturalari. Egun horretarako mahai-ingurua antolatu dute Biterin. Hizketagai izango da Arrazismoa eta delinkuentzia: fikzioak, errealitateak eta hobetzeko neurriak. Hitzaldia emango dute Agustin Unzurrunzaga Sos Arrazakeriako bozeramaileak eta Cesar San Juan Euskal Herriko Unibertsitateko Psikologoak. Ostegunean, arratsaldeko 19.00etan Biterin izango da.
Ostiralean festa Plaza Berrin
Aste Multikulturala ostiralean amaituko da eta egun horretarako festa antolatu dute. Arratsaldeko 16:30etan hasita izango dira txokolatada, Ansa ahizpen kontzertua eta Esperanza Latina taldearen dantzaldia. Festa Plaza Berrin izango da; euria egingo balu, Sandiusterrin.
Argazki lehiaketako sari banaketa ere bai
Amherrek argazki lehiaketa antolatu du aurten lehenengo aldiz eta sariak Aste Multikulturalaren barruan banatuko dituzte. Ostiralean arratsaldeko 18:00etan izango da Plaza Berrin (eguraldi txarrarekin Sandiusterrin). Hernaniarrek beren botua emateko aukera ere badute eta horretarako lanak ikusgai jarri dituzte leku hauetan: Oan, Peña Okindegian, Iradin eta Kinoan. Kaxa bat jarri dute denda bakoitzean botua eman ahal izateko.