GARAGARDOA dastatzea eta janari berezia jatea gustuko dutenek aukera paregabea izango dute hilaren 15etik 18ra. Errugbi taldeak Garagardo Azoka antolatu du, aurtengoarekin 6garren aldiz, eta aukera ez da makala izango; 13 garagardo inguru izango dira probatzeko.
Errugbi elkarteko talde
guztiak banan-banan
Garagardo Azokako aurreneko kañeroa arratsaldeko 19:00etan irekiko da, baina aldez aurretik, 18:00etan bertara hurbiltzen diren errugbizale guztiek taldea barru-barrutik ezagutuko dute. Maila txikieneko taldetik hasita, bananbanan aurkeztuko dira talde guztietako jokalariak.
Aurten zortzi taldek osatzen dute elkartea, eta horietatik sei zaharrenak arituko dira txapelketan: Bi senior, jubenilak, kadeteak, infantilak, alebinak, benjaminak, eta aurrebenjaminak. Bi senior taldeak kontuan izanda, guztira 47 jokalarik dute fitxa; jubeniletan 25ek, kadeteetan 22k, infantiletan 11k, alebinetan 17k, benjaminetan 14k eta aurrebenjaminetan 18k.
13 garagardoak eta Garagardo Azokako menua
Garagardo Azokara hurbiltzen direnek aurkituko duten eskaintza ez da makala izango. Guztira 13 garagardo ezberdin probatzeko aukera izango da, horietatik bat edo beste berriak: Heineken, Guinness, Murphy´s eta Paulaner markak.
Azokan baita ere, garagardo on batek merezi duen moduan, Garagardo Azokako menua ere izango da. Jateko izango dira tradizionalak diren kodilloa, saltxitxak eta euskal oilaskoa (luma gorria).
Lau egunetako ordutegia
Garagardo Azoka zabalik izango da ostegun eta ostiralean arratsaldeko 19:30etatik gaueko 01:00ak ingurura arte. Asteburuko ordutegia berriz, zabalagoa izango da. Larunbat eta igandean afaltzeaz gain, bazkaltzeko aukera ere izango da bertan: eguerdiko 12:30etan irekiko dute eta 16:00ak arte izango da zabalik. Arratsaldean, 16:00etatik 19:00etara garagardoa edateko aukera bakarrik izango da. Ordu horretatik aurrera berriz, goizaldeko 01:00ak arte izango da aukera. Jakinarazi dutenez, lau egun hauetan azoka ixteko ordua momentu horretan dabilen jende kopuruak baldintza dezake.
Taldearentzako laguntza
Azoka, hernaniar askorentzat, aitzakia paregabea izaten da garagardoa dastatzen eta menua jaten duten bitartean momentu atseginak pasatzeko. Errugbi elkartearentzat berriz, honen helburua harantzago doa. Azokan ateratzen duten dirua bere aurrekontuaren herena izaten da. Diru hori behar-beharrezkoa izaten dute urtean zehar egin beharreko bidaia, ekipamendu eta abarrentzako.