alboka hotsak herrian barrena zabalduko dituzte gaur, Euskal Herriko albokarien topaketa izango baita Hernanin. Aurtengoa topaketaren 16garren edizioa izango da, eta ekitaldiak atzo hasi baziren ere, egun haundia gaurkoa izango da.
Liburu aurkezpena, kalejira, bazkaria, erakusketa....
Hernaniko albokarien topaketa hitzordu garrantzitsua izaten da Euskal Herriko hainbat eskualdeetako albokarientzat, guztiak biltzeko aitzakia paregabea izaten baita. Gaurko eguna goizeko 10:30etan hasiko dute, Eugenio Etxeberria albokaria izeneko liburuaren aurkezpenarekin, Musika eskolan. Ondoren, 12:00etan, alboka doinuak zabalduko dituzte herriko kaleetan barrena. Hala ere, albokari guztien emanaldi nagusia ordu erdi beranduago izango da, 12:30etan; Albokaldia izango da Ezkiaga pasealekuan (euria egingo balu Atsegindegin). Ordu berean baita ere, albokagileen azoka eta erakusketa izango da. Bertan ikusi ahal izango dira albokak egiteko duten trebezia eta azken berrikuntzak. Arratsalderako indarrak berreskuratzeko, 14:30etan bazkaria izango dute. Albokarien arteko herri bazkaria izango da, eta Santa Barbara elkartean egingo dute. Jaian parte hartu ez duen norbaitek bazkarira joan nahiko balu, 20 euro ordaindu behar ditu. Azkenik, eta eguna bukatzeko, Albokarien agurreko kalejira egingo dute, Kaxkoko kale eta Plazetan barrena.