jendetza ibili da asteburuan Hernanin eta atzo ere bete antzera zegoen plaza. Batzuk sagardoa probatzen, beste batzuk sagarra biltzen, eta beste batzuk sagarra jotzen ere bai. Inguruko sagar ederrak ezagutzeko eta erosteko aukera izan zen, baita kizkiak erosteko ere. Hori dena, trikiti doinuek goxatuta.
Trikitilari Gazteen Txapelketa zuzenean
Atzo Trikitilari Gazteen Txapelketa izan zen plazan. Sei bikotek hartu zuten parte eta Edurne Errandonea andoaindarrak eta Ander Beldarrain aiarrak irabazi zuten. Hernaniko Irati Ugaldek eta Amaia Mujikak 4garren postua egin zuten eta Ainhoa Errazkinek eta Olatz Jakak 6garrena.
Pelota partiduak
Eguerdian Tilosetako frontoiaren buelta jendez bete zen, pala partiduak ikustera. Amaia Irazustabarrenak eta Nagore Arozenak 30-26 irabazi zuten Goiatz Manzisidor eta Ainhoa Montesen aurka. Frontoiaren egoera zela eta, eskuzko partiduak bertan behera geratu ziren.
‘Dultzemeneoan’
Festarako indarrak ederki hartu zituzten eguerdian Atsegindegin, bazkari ederra eginda. Kantuan eta musean aritzeko denbora ere izan zuten bazkaldarrak.
Garai bateko kontuak berritzen hasita, ezin Tilosetako dantzaldia falta. Musika Bandak eta Txistulari Bandak gozatzekoa zuten Tilosetako arbolazpia iluntzean.