Kontrakantxa Gaztetxeak atzo ireki zituen ateak, berriro. Azken hilabeteotan txukundu, konpondu eta garbitu ondoren, edozeinen eskura jarri dute. Horixe da asmoa, herriko gazte guztientzako leku bat izatea, bakoitzak nahi duen hori egiteko aukera izateko.
Mugimendua sortzea du helburu Gaztetxeak, giro ederra izatea. Horretarako, lokala egokitu dute ekintza ugari antolatzeko: tailerrak, hitzaldiak, jolasak, kontzertuak...
Guzti horretarako, atzo eman zuten lehenengo pausoa. Herriko eragile ezberdinak bildu ziren Gaztetxean, oinarrizko araudi bat eztabaidatzeko. Izan ere, guztiona izanik, guztiok zaindu beharrekoa ere badela azpimarratu dute. Horrela, bizikidetzarako arau batzuk jarriko dira, erabiltzen duenak hartu bezala utzi dezan.
Gaztetxearen irekiera ospatzeko, hainbat ekitaldi antolatu dituzte, hurrengo egunetarako. Gaurtik ostegunera, izango da zerekin entretenitu.
Hasteko, haurrentzat jolasak eta xamurtasun-tailerra
Gaur bertan, haurrentzako jolasak izango dira, arratsaldeko 17:00etan. Iluntzean, berriz, xamurtasun-tailerra izango da. Asmoa da konfiantza lantzea, masajeen eta kontaktuaren bitartez.
Txapelketen eguna izango da biharkoa. Ping pong, futbolina, kartak, oka... izango dira, 17:00etan. Ostegunean, berriz, pintxo-potea izango da, Olinpiaden bileraren ondoren.