Dulce Pontesen bandaren kide bezala, Amsterdameko Royal Theatre Carre antzoki ospetsuan emandako kontzertuan izan zen ostegunean Joxan Goikoetxea musikari hernaniarra. Musika eskolako zuzendari lanaz aparte ari da parte hartzen Joxan Goikoetxea Dulce Pontes abeslariak Momentos diska atera ondorengo kontzertu hauetan. Bira honetan izugarrizko arrakasta izaten ari dira. Amsterdameko kontzertu honetarako, adibidez, orain dela hilabete baino gehiago agortu ziren sarrera guztiak.
Hernaniko Musika Eskolatik, mundura
Joxan Goikoetxea 17 urterekin hasi zen lanean Hernaniko Musika Eskolan, Donostiako Kontserbatorioan ikasteketak bukatu ostean oposaketetan plaza lortuta. «Gaur egun, Juan Mari Beltran, Arantxa Alberdi eta ni bakarrik geratzen gara lanean, Musika Eskolaren sorreran geundenen artean».
Aurten 25 urte betetzen ditu Musika Eskolak eta horregatik aurtengo San Joan jaietako txupinazoa botako dute Joxan Goikoetxeak eta Musika Eskolako beste kideek.
Hainbat musikarirekin kolaborazioak
Musika Eskolan burutzen duen lanaz gain, Goikoetxeak, ospe haundiko musikari askorekin lan egin du, beraien estudioko lanetan edo kontzertuetan parte hartzen. Besteak beste, Xabier Lete, Estrella Morente, Noa, Alberto Iglesias, Jorge Drexler edo Kepa Junkerarekin egin du lana Goikoetxeak eta gaur egun Dulce Pontes abeslari portugaldarrarekin ari da.
`Momentos´ biran, antzoki garrantzitsuenetan
Dulce Pontesekin batera, Joxan Goikoetxeak, Europako eszenatoki prestijiotsuenak zapaldu ditu.
«Mendizaleentzat 8.000ko mendiak igotzea edo kotxe gidarientzat beraien bolidoa Monzako zirkuitotik gidatzea bezalakoa da niretzat antzoki hauetan jo ahal izatea».
Musikaren munduan pare bat urtez geldirik egon ondoren agertu zaio aukera hau Goikoetxeari. Besteak beste, Atenaseko Akropoliko Parthenonean, Bartzelonako Palau de la musica, Meridako antzoki erromatarrean edo Huelvako foro iberoamerikarrean jo du 3.000 pertsona baino gehiagoren aurrean.
«Ez nuen uste nire ibilbidearen garai honetan horrelako bira garrantzitsu batean parte hartzeko aukera izango nuenik» dio Joxanek Amsterdamera joateko prestatzen ari zen bitartean. «Dulce Pontes izugarrizkoa da. Bi aurpegi ditu, Fadoetan murgiltzen denean goxoa da, sentimentala. Baina beste doinuren batekin hasten denean energia haundiko emakumea da, sumendi baten antzekoa».
Oso pozik birak eta diskoak izan duten harrerarekin
Joxan oso pozik dago bira honek izan duen harrerarekin. Momentos diskak oso erantzun ona izan zuen zaleen artean eta kontzertuetarako sarrerak segituan agortzen omen dira. Banda oso ona dutela diote, maila haundikoa, eta beraiekin kolaboratzen jarraituko duela argi du.
«Dulce, Iberia disko berria prestatzen ari da, Penintsulako kultura minoritarioei errepasoa emanez. Diska, horretarrako Dulce Pontes, Xabier Lete eta ni ari gara elkarlanean, diskoan, Dulce Pontesek pare bat abestietan euskaraz kanta dezan».