Natzak antolatutako Independentziara bidezidorra hitzaldi zikloaren barruan, Zumitza tabernan hizketan ariko dira gaur 19:30etan Aritz Intxusta Garako kazetaria, eta Patxi Zamora KONTUZ plataformako bozeramailea, Zertan da aldaketa aukera? hitzaldian. Nafarroako egoera sozio-politikoa aztertuko dute, bien artean eta Patxi Gilekin batean idatzitako El Banquete. Expolio y desaparición de la CAN liburuaren harira.
Intxustaren esanetan, «liburuaren seigarren ediziora iritsi gara, esku batetik bestera zabaltzen ari baita; baita UPN bozkatzen dutenen artean ere. Bertan, Nafarroa azken hamarkadatan gobernatu duten politikari eta enpresaburuak erretratatu ditugu»
«Egoera ekonomiko oso zailean dago Nafarroa»
Nafarroako egoera ekonomikoaren azterketa egingo dute hizlariek gaurkoan, eta Intxusta kazetariak laburpen bat egin du aurretik.
«BEZa biltzeko sisteman 2012an egindako aldaketen ondorioz, Ogasunak ez du nahikoa diru biltzen, eta Gobernua tranpak egiten ari da. Ogasunean tentsio oso haundiak izan dira, eta bertako buru zenak dimisioa aurkeztu zuen. Ia aurretik eraman zuen Barcina bera ere. Baina Barcinak Cospedalekin eta PPrekin dituen harreman onen ondorioz, Estatuak krisi politikoa gelditzea lortu zuen. Hala ere, egoera ekonomikoa lehen bezain txarra da, eta Nafarroako Kutxa (CAN) galdu izanak maniobratarako aukerarik gabe utzi du Gobernua».
«Egindakoa ordainarazi behar diete nafarrek»
Intxustak dio pozik daudela «gero eta jende gehiagok galdu duelako beldurra salaketa egin eta dakiena publikoki kontatzeko. Nafarrek egin dezaketena da ixilik ez gelditu, inpunitatearekin bukatu, eta hankaz gora bota sistema hau, familia gutxi batzuek herrialdea kontrolatzeko eraiki dutena».
«Herriak nola erantzungo duen, presioa nola egingo duen ez dakigu».
Hitzaldiaren izenburua horregatik da galdera, Intxustaren esanetan. «Inork ardurarik eskatu gabe bizitzeko baliagarria izan da gutxi batzuentzat betiko mehatxua, badatoz euskaldunak!. Nafarroako kudeaketatik kanpo uzten badira abertzaleak, UPN-PSN tandemak du botere absolutua. Orain, dirurik ez dagoenean, itsu egon den herritar asko esnatu da. Baina oraindik ez dakigu Nafarroa aldatzeko zorian dagoen ala ez; herriak nola erantzungo duen, presioa nola egingo duen».