Portu auzo elkarteak udaberriko ekintza kulturalen programa osatu du maiatzerako. Lehengo asteburuan lokala garbitu eta txukundu zuten, hain zuzen, datozen ekintza hauetarako prest egoteko. Ekintza horietako batzuetan izena eman behar da aurretik, Pedro Mari tabernan.
Hitzaldia ostiralean, Iñaki Sanzen eskutik
Hasteko, datorren ostiralean hitzaldia emango du, auzo-elkarteko lokalean bertan, Iñaki Sanz Azkue Aranzadiko biologoak. Gaia izango da Portuko umeak eta natura. Nolako auzoa nahi duzu zure seme-alabentzat? Arratsaldeko 19:00etan hasiko da.
Irteerak, Lantziegora eta Añarbeko urtegira
Egun-pasak ere antolatu dituzten hil honetarako, eta horietan parte hartzeko izena eman beharko da Pedro Mari tabernan jarritako zerrendan.
Batetik, maiatzaren 10ean Lantziegora irteera antolatu da, bertako De Luis R. bodega bisitatzeko. Elkartetik jakinarazi dutenez, irteera honetan parte hartzeko lekuak beteta daude dagoeneko.
Lantziegora joateko tokiak bete dira, dagoeneko.
Bigarren irteera bat ere antolatu dute maiatzaren 24rako, Añarbeko urtegira. Duela gutxi jarri dituzte kamarak urtegian, edonork bere etxetik eta momentu errealean urtegiko ateak nola dauden ikusteko, eta urtegiaren beraren egoera zein den ezagutzeko. Honen harira, bizilagunentzako bisita gidatuak antolatzen ari dira. Goizeko 09:00etan aterako dira Plazatik, eta Añarbe ikusi ondoren, Goizuetan bazkalduko dute. Umeek 8 euro ordaindu beharko dituzte, eta helduek, 10.
Sagardo-dastaketa komentatua, hilaren 16an
Maiatzaren 16an sagardo-dastaketa komentatua egingo da, arratsaldeko 19:30etan. Bertan parte hartu dezakeen jende kopurua ere mugatua da, eta beraz, lehenbailehen izena ematea komeni da.
- Maiatzak 9: Hitzaldia, 19:00etan Portuko Auzo Elkartean.
- Maiatzak 10: Lantziegoko De Luis R. bodegara bisita.
- Maiatzak 16: Sagardo-dastaketa komentatua, 19:30etan Portuko Auzo Elkartean.
- Maiatzak 24: Añarbeko urtegira bisita eta Goizuetan bazkaria, 09:00etan Plazan.