Hernaniko bertso eskolak bukatu du Hernani Bertsotan ikerketa proiektu mardula. DVDa, web orrialdea, unitate didaktikoak, eta bertso liburua. Bertsoaren historia eta oraina ikertu, bildu eta zabaltzea izan da proiektuaren helburua, eta sei urtetik gorako lana izan da.
Joan den igandean Estitxu Eizagirre Kerejetak bertsozaleen aurrean erakutsi zuen berak idatzitako liburua. 50 elkarrizketetan oinarritutako liburua, Auspoako 15 liburu, eta Bertsozale Elkarteko datu basean oinarritua, eta dena lehenengo pertsonan kontatua. Hori da, hain zuzen, liburuaren ezaugarrietako bat, elkarrizketatuek kontatzen dutela historia, eta narratzaile batek. Eizagirrek egin duena da, «pieza bakoitza puzzlean dagokion lekuan jarri».
‘Bertsoaren haria Hernanin’, lau hanketan azkena
Hernani Bertsotan proiektuak lau egitasmo zituen: Hernani Bertsotan DVD bikoitza, 2010ean argitaratua 32 elkarrizketarekin (Jexux Mari Irazuk eta Unai Agirrek eginak); webgunea, egina dagoena eta orain elikatuko dutena; ikastetxeetarako unitate didaktikoak; eta Bertsoaren haria Hernanin liburua, igandean aurkeztua. Proiektuak Hernaniko Udalaren laguntza izan du.
Liburua salgai, 25 euroan: Hernaniko Leokadisti eta Elkar liburudendetan, Hernaniko Dobera Euskara Elkartean, Hernaniko bertso eskolan, eta Argia.com-en ere bai.