Ireki da matrikulazio-epea datorren urtean batxilergo edo Lanbide Heziketako ikasketak Hernanin egin nahi dituztenentzako. Hain zuzen, Hernanin ikasten ari diren adin horretako ikasleak 156 dira: 130 ikasle ari dira Hernani BHI Institutuan DBH 4. maila egiten, eta beste 26 ari dira Inmakulada ikastetxean. Hala ere, EUSTATeko datuen arabera, 1998an 189 jaiotza erroldatu ziren Hernanin. Beraz, datorren urtean batxilergoa edo Lanbide Heziketako zikloren bat ikasteko adinean dauden ikasleak gehixeago dira.
Ikasleek dituzten aukeren inguruko hainbat datu eman dizkigute Amaia Urzelai Institutuko zuzendariak, Mikel Larrañaga Lanbide Heziketako arduradunak eta Javier Ezenarro orientatzaileak.
2 batxilergo eta 7 ziklo
Hernani BHI Institutuan bi batxilergo egiteko aukera dago: Giza eta Gizarte Zientziak, batetik, eta Zientzia eta teknologia, bestetik. Batxilergo artistikoa egiteko, berriz, Donostiara edo inguruko beste herri batzuetara joan behar da, Hernanin ez baitago aukera hori.
Gaur egun, 203 ikasle daude batxilergoko bi mailatan. Bina lerro, mota bakoitzean. Lerro bakoitzean 30 ikasle onartzen ditu orain Eusko Jaurlaritzak, baina beharren arabera lerro gehiago sortu daitezke.
Institutuko arduradunek diote bi batxilergo motetan antzekoa dela ikasle kopurua. «Baina unibertsitateko ikasketak aukeratzeko orduan, bedirudi ingeniaritzek badutela horrelako arrakasta bat. Osasun zientzietan ere beti izaten da baten bat, erizaintzan, medikuntzan, fisioterapian... Eta letrak egiten dituzten gehienek irakaskuntzara jotzen dute».
Lanbide Heziketako zikloei dagokienez, animazioa, mekanika, elektrizitate eta osasungintzako alorretako 7 ziklo egin daitezke Hernanin: Erdi Mailako hiru eta Goi Mailako beste hiru Hernani BHIn, eta Erdi Mailako beste bat Inmakulada ikastetxean. Horrez gain, Hernani BHIk aukera ematen du Hasierako Lanbide Prestakuntzako bi ikastaro egiteko graduaturik ez dutenentzat, eta sarbide probak prestatzeko beste ikastaro bat Erdi Mailako ziklo batetik Goi Mailakora pasa nahi dutenentzat.
«Aukerak haunditu egin dira, eta erabakia hartzea gero eta zailagoa egiten zaie ikasleei».
«Orain ez dugu ikasle galerarik nabaritzen kurtsoz kurtso, eta beheko mailetan ikasle kopurua geroz eta haundiagoa da».
Batxilergoa, gehienen aukera
Ikasleen esku dago datorren urtean batxilergoa ala Lanbide Heziketako zikloren bat aukeratu. Institutuko arduradunen esanetan «gehiago dira batxilergoa aukeratzen duten ikasleak; %70 edo 80 inguru».
Ez da sekula erraza izan aukera egitea. «Beti esan dena esaten diegu: gustokoa dena aukera dezatela. Aukera haunditu egin da, eta erabakia hartzea gero eta zailagoa egiten zaie ikasleei. Hala ere, geihagok aukeratzen dute batxilergoa», dio Ezenarrok. Larrañagaren esanetan, «orain urte batzuk hasi zen Eusko Jaurlaritza esanez Lanbide Heziketa ikasteko, urte gutxira langile tekniko asko beharko zirelako. Baina krisia etorri da eta ez da ezer ikusten. Hala ere, oraindik animatzen jarraitzen dute. Auskalo. Lan berriak ere sortuko direla esaten da». «Orain formakuntza bizi osorako izaten da» dio Urzelaik, «moldatu eta egokitzen jarraitzeko gaitasunak ematea da gure lana».
«Institutuko eraikin berriaren obrak atzeratu egin dira urtebetez, eta lortu nahi dugu gehiago ez atzeratzea».
Gero eta ikasle gehiago
Hernanin dagoen ikasle kopurua gora dijoala ere aipatzen dute arduradunek.
«Orain batxilergoko 2.mailan 101 ikasle daude, eta 1.mailan, 102. DBH 4.mailan, berriz, 130, eta 3.mailan 134. Baina DBH 1.mailan, adibidez, aurten 7 lerro ditugu, eta datorren urterako 150 matrikula eginda daude dagoeneko. Bestalde, Hernanitik kanpora ikastera joaten direnak ez dakigu zenbat diren, baina orain kurtsoz kurtso ez dugu ikasle galerarik nabaritzen, eta, esan bezalaka, beheko mailetan ikasle kopurua geroz eta haundiagoa da».
Ez dirudi ez, asko direnik Hernanitik kanpora joaten diren ikasleak. Izan ere, 189 dira datorren urtean batxilerra edo Lanbide Heziketa ikasteko adinean dauden hernaniar erroldatuak, eta horietatik 156k Hernanin ikasten dute dagoeneko.
Eraikin berria lehenbailehen lortzeko ahaleginean
Gero eta ikasle gehiago, orduan eta espazio gehiago behar, eta Institutuko eraikin berrirako obrak atzeratuta dijoaz. «Eraikin berriaren obrak atzeratu egin dira urtebetez, eta lortu nahi dugu gehiago ez atzeratzea. Badirudi egingo dela baina... Espero genuen 2013 bukaeran obren esleipena lehiaketara ateratzea, eta 2014 bukaeran eraikitzen hastea. DBH 3.mailakoentzat 6 gela aterako lirateke. Bitartean, espazioa planifikatzen ari gara».