Ez dira 20 urte egunero betetzen, eta horrelako okasio berezia ospatzeko, kontzertu berezia prestatu du gaurko Ozenki abesbatzak.
Emanaldia arratsaldeko 19:30etan hasiko da, Milagrosan, eta Ozenki abesbatzaz gain, bertan hartuko dute parte, baita ere, Getariko Musika Bandak eta Zikuñagako danbor eta barrilek.
«Desiatzen egoten naiz beraiek etortzeko»
20 urte betetzen ditu aurten Ozenki abesbatzak, eta 20 urte daramazki, hain zuzen, Imanol Kamiok abesbatza hau zuzentzen.
«94an sortu zen. Umeen abesbatza banuen lehendik, baina helduen ahotsekin beste bat egiteko ideiarekin nengoen, desberdina baita. Hasieran, lagun batzuei komentatu nien, eta tartean ikasle batzuk sartu nituen. Ereñotzun hasi ginen entseatzen, 50 bat pertsona. Herriko jendea ere bazen: Aranokoak, Goizuetako 2 ahizpa, Igeldokoak. Eta bereziki aipatu nahi ditut Mari Carmen Santa Kruz eta Maite Zabala. Haiek 20 urte daramazkite nerekin; bigarren matrimonio moduko bat da gurea! Egia esan, eskerrak jende askori eman beharko dizkiogu gaur. Plazer bat izan da 20 urtean zein jende jator eta umila izan dudan».
Beste 20 urtean ere jarraituko lukeela dio Kamiok. «Jende hau daukaten bitartean, bi emakume horiek eta, jarraituko dut. Desiatzen egoten naiz beraiek etortzeko. Orain 3-4 urte izan nuen horrelako krisi bat. Nahi nuen beste koxka bat igo. Baina jende batek esan zidan horra igotzekotan utzi egingo zutela. Eta ez zuen merezi jendea kanpoan geratzea horregatik. Profesional bezala gehiago nahi duzu, baina ez du merezi. Hauek %100 ematen dute, eta oso pozik nago. Gainera, askorentzat terapia modukoa da hau, baltsamo bat».
«Jende hau daukadan bitartean jarraituko dut; bereziki, Mari Carmen Santa Kruzek eta Maite Zabalak jarraitzen duten bitartean»
«Amaia-Aimar Elosegi Ansari eskainitako kantu bat estreinatuko dugu, oso polita, neska brasildar batek egindako prologo eta guzti»
Lau obra berri, gaur
«Gurea ez da abesbatza profesionala. Sakro aldetik eta, egin ditugu gauzak, baina jendeari gehiago gustatzen zaigu folklorea, eta egiten dugu gustatzen zaiguna, ez oso teknikoa».
Gaurkoan, 9 pieza entzun ahal izango dira, horietatik 4 estreinaldiak. Lehenengo Getariko Bandak joko du. «Zuzendaria laguna da eta berak proposatu zidan truke moduko bat egitea. Gu hurrengo urtean joango gara hara». Estreinatuko duten lehenengo kanta berriz, Amaia-Aimar Elosegi Ansari eskainitakoa izango da. «Oso berezia izango da. Sebastian Martinezek, La Oreja de Van Gogh taldeko kantariaren aitak, Amaia-Aimarren lagun baten bidez istorioa ezagutu eta txundituta geratu zen, eta letra egin zuen. Nik musika jarri nion. Gero, La Oreja de Van Gogheko abeslariaren jarraitzaile brasildar bat, Ana, berarekin harremanetan jarri zen. Oso sensiblea da eta prologo bat egin dio kantuari, oso polita».
Estreinatuko dituzte baita ere Gure Aita, Lizartzako lagun batek egina, Barbero de Sevillaren Overture eta Zikuñagako danborrada.