Taldea sortu zen aurreko asteazkenean, Gure Esku Dago dinamika aurrera eramateko, eta gaur bilera deitu dute. Jakinarazi dute, bilerak irekiak direla, edonork proposatu dezakeela edozer. Bilera 19:30etan izango da Astigar dantza taldearen lokalean.
Aurreneko bilerak izandako erantzunarekin gustora dira taldekideak: «Partaidetza ona izan zen kopuru aldetik (20 bat lagun) eta aberasgarria aniztasunari dagokionean». Erabakitzeko eskubideak elkartzen dituztela azaldu dute: «Bertaratu ginenok, batekoak eta bestekoak, argi dugu erabakitzeko eskubideak elkartzen gaituela eta oraindik Astigarragan jende asko eta asko dagoela bat egiteko prest, oinarrizko eskubide honen inguruan».
Pertsona eta talde desberdinen babesa
Taldearen helburua da, «ahalik eta jende gehien lortzea, oinarrizkoa den erabakitzeko eskubidearen aldarrikapenerako eta ekainaren 8an, Durango eta Iruña elkartuko dituen gizakaterako».
Bide horretan, herriko talde eta pertsona desberdinekin bilduko dira erabakitzeko eskubidearen inguruan beren babesa eman dezaten. Horrez gain, azaldu dute, taberna, denda eta kaleak erabiliko dituztela gizakaterako metroak saltzeko.
Aurkezpena eta festa
Maiatzaren 10ean, aurkezpen erraldoi bat egitekoak dira; izan ere, hilaren bukaera aldera jai berezi bat antolatzeko asmoa dute, ekainaren 8ko gizakatearen bidean.